विश्व शान्ति दिवस आज विभिन्न कार्यक्रम गरी मनाइँदै छ । हरेक वर्ष सेप्टेम्बर २१ तारिखलाई विश्व शान्ति दिवसका रूपमा मनाइन्छ । सन् १९८१ मा संयुक्त राष्ट्र संघको महासभाले आह्वान गरेअनुरूप सन् १९८२ देखि यो दिवस मनाउन सुरु गरिएको हो । सन् २००१ सम्म सेप्टेम्बरको तेस्रो मंगलबार मनाइँदै आइएको यो दिवस २००२ देखि सेप्टेम्बर २१ मा मनाउन थालिएको पाइन्छ । नेपालमा यो दिवस २०६५ देखि मनाउन सुरु गरिएको हो । युद्ध, हिंसा, द्वन्द्व र घृणाबाट मुक्त भएर मानव सभ्यतालाई शान्ति, सहअस्तित्व र आपसी सद्भावको बाटोमा अघि बढाउने उद्देश्यले यो दिवस मनाउने गरिन्छ  । शान्ति केवल युद्ध नहुनु मात्र होइन, समानता, न्याय, मानव अधिकार, सहिष्णुता र सुरक्षित जीवनको सुनिश्चितता पनि शान्तिका आधार हुन् ।

आज विश्वका विभिन्न भागमा युद्ध, राजनीतिक द्वन्द्व, धार्मिक तथा जातीय तनाव, विस्थापन र हिंसाका घटना भइरहेका छन् । यसको सबैभन्दा ठूलो असर निर्दोष नागरिक, बालबालिका, महिला तथा ज्येष्ठ नागरिकमाथि पर्ने गरेको छ । आधुनिक विज्ञान र प्रविधिले संसारलाई नजिक ल्याए पनि मानवीय असहिष्णुता र स्वार्थले समाजमा विभाजन बढाइरहेको देखिन्छ । यस्तो अवस्थामा विश्व शान्ति दिवसको सन्देश अझ सान्दर्भिक बनेको छ । शान्ति स्थापना सरकार वा अन्तर्राष्ट्रिय संस्थाको मात्र जिम्मेवारी होइन । परिवारदेखि समाजसम्म प्रत्येक व्यक्तिले आफ्नो व्यवहारमा शान्ति र सहिष्णुतालाई अपनाउन आवश्यक छ । फरक विचार, धर्म, भाषा, संस्कृति र पहिचान भएका मानिसलाई सम्मान गर्ने संस्कार विकास गर्न सके द्वन्द्वका धेरै कारणलाई कम गर्न सकिन्छ । संवाद, सहकार्य र समझदारी नै विवाद समाधानका दिगो माध्यम हुन् । नेपालजस्तो विविधतापूर्ण देशका लागि पनि शान्ति र सामाजिक सद्भाव अत्यन्त महत्वपूर्ण छन् । हाम्रो समाजमा रहेका विविधतालाई विभाजनको कारण होइन, साझा शक्ति र पहिचानका रूपमा स्वीकार गर्नुपर्छ । असहमतिको सम्मान गर्दै संवादबाट समस्याको समाधान खोज्ने संस्कार विकास गर्नु आजको आवश्यकता हो । विश्व शान्ति दिवस केवल एउटा दिवस मनाउने औपचारिक अवसरमा सीमित हुनु हुँदैन ।

यसले हामीलाई हिंसाभन्दा संवाद, घृणाभन्दा प्रेम र विभाजनभन्दा सहकार्य रोज्न प्रेरित गर्नुपर्छ । शान्त विश्व निर्माणको सुरुवात अरूबाट होइन, आफ्नै सोच र व्यवहारबाट हुन्छ । त्यसैले आजको दिनमा हामी सबैले आफू, आफ्नो समाज र समग्र मानवजातिका लागि शान्ति, सहिष्णुता र सद्भाव कायम गर्ने प्रतिबद्धता जनाऔँ ।शान्ति नै मानव सभ्यताको साझा आवश्यकता हो, यसको संरक्षण र प्रवद्र्धन हाम्रो साझा जिम्मेवारी हो ।