कुशे औंसी अर्थात् आज बुबाको मुख हेर्ने दिन । आफ्ना बुबालाई मिठो खाना र राम्रा कपडा दिएर सम्मान गर्ने गरिन्छ । आजको दिन बुवाको मुख हेर्ने, अर्थात् बुवालाई विशेष सम्मान गर्ने । बाबु नहुनेले तीर्थमा खासगरी गोकर्ण र विष्णुपादुकामा श्राद्ध, तर्पण, दान, पुण्य गरी पितृ तार्ने र आफू पुण्यात्मा बन्ने विश्वास गरिन्छ । पितृदिवस भाद्रकृष्ण अमावस्याको दिन हो । अमावस्याको रातका अधिपति पितृ हुन् । मानिसहरूले आफ्ना आमा बाबुहरूको सम्झना खासगरी जीवनको अन्धकारमय रातमैं गर्ने हुँदा अमावस्याका दिनमै ती दुबै दिवसहरू मान्ने गरिआएको हो । पितृ देवो भव भन्ने हाम्रो संस्कृतिले पितालाई देवताको रुपमा लिने चलन छ ।

बुवाले परिवारको जिम्मेवारी बोकेर सन्तानको भविष्य निर्माणमा महत्वपूर्ण भूमिका निर्वाह गर्ने गर्दछन् । त्यसैले बुवा केवल परिवारको अभिभावक मात्र नभई हाम्रो जीवनका मार्गदर्शक, संरक्षक र प्रेरणाका स्रोत पनि हुन् । बुवाले आफ्ना इच्छा, रहर र सुखलाई पछि पारेर सन्तानको उज्ज्वल भविष्यका लागि निरन्तर मेहनत गर्छ । बिहानदेखि बेलुकासम्म परिश्रम गरेर परिवारको आवश्यकता पूरा गर्ने क्रममा  अनेकौँ दुःख र कठिनाइ  बुवाले सहनु परेको हुन्छ । तर आफ्नो पीडा लुकाएर सन्तानको अनुहारमा मुस्कान देख्न चाहन्छन् । बुवाको यही त्याग, समर्पण र जिम्मेवारीलाई हामीले कहिल्यै भुल्नु हुँदैन । आजको आधुनिक समाजमा व्यस्तता र व्यक्तिगत स्वार्थका कारण कतिपय सन्तान आफ्ना अभिभावकप्रति पर्याप्त ध्यान दिन नसक्ने अवस्था देखिन्छ । प्रविधि र भौतिक सुविधाको विकाससँगै मानवीय सम्बन्धमा दूरी बढ्नु चिन्ताको विषय हो । बुवाले जीवनभर हाम्रो भविष्यका लागि गरेको त्यागको मूल्य पैसाले तिर्न सकिँदैन ।

त्यसैले बुवालाई सम्मान गर्नु हाम्रो कर्तव्य मात्र होइन, हाम्रो संस्कार र नैतिक जिम्मेवारी पनि हो । बुवालाई सम्मान गर्न ठूलो काम नै गर्नुपर्छ भन्ने छैन । बुवासँग मिठो बोली बोल्नु, उहाँका कुरा ध्यानपूर्वक सुन्नु, आवश्यक पर्दा सहयोग गर्नु, उहाँको स्वास्थ्य र भावनाको ख्याल गर्नु तथा उहाँको संघर्षलाई बुझ्नु नै सच्चा सम्मान हो । हामीले आफ्नो असल व्यवहार, मेहनत र सफलतामार्फत पनि बुवाप्रति कृतज्ञता व्यक्त गर्न सक्छौँ । अन्ततः, बुवा हाम्रो जीवनको अमूल्य सम्पत्ति हुनुहुन्छ । उहाँको योगदान र त्यागलाई सम्झँदै जीवनको हरेक चरणमा उहाँप्रति सम्मान, प्रेम र कृतज्ञता व्यक्त गरौँ । बुवा जीवित रहँदासम्म उहाँको महत्व बुझौँ र पछि पश्चात्ताप गर्नुपर्ने अवस्था आउन नदिऔँ । बुवालाई सधैँ सम्मान गरौँ, उहाँको त्यागलाई सधैँ सम्झिरहौँ र उहाँको अनुहारमा सधैँ मुस्कान ल्याउने प्रयास गरौँ ।