हरेक वर्ष विश्वभर मनाइने बुबाआमा दिवस अभिभावकप्रतिको श्रद्धा, माया, सम्मान र कृतज्ञता प्रकट गर्ने एक महत्वपूर्ण अवसर हो । जीवनका प्रथम गुरुका रूपमा बुबा र आमा न केवल शारीरिक रूपमा सन्तानलाई जन्म दिन्छन्, उनीहरूले जीवनको हरपलमा माया, स्नेह, संरक्षण र मार्गदर्शन पनि दिन्छन् ।

आजको व्यस्त र प्रविधिमैत्री युगमा जहाँ संयुक्त परिवारको परम्परा कमजोर हुँदै गएको छ, त्यहाँ यो दिवसले हामीलाई अभिभावकसँगको सम्बन्धलाई पुनः मजबुत बनाउने अवसर दिन्छ । अध्ययन, रोजगारी र अन्य कारणले टाढा रहेका सन्तानहरूका लागि यो दिन आत्मीयता, सम्झना र सन्देश दिने सेतु बनेको छ । यो अवसर केवल उपहार वा भोजको लागि मात्र होइन, यो सच्चा माया, सम्मान र सेवाभाव प्रदर्शन गर्ने दिन पनि हो । वृद्ध अवस्थामा अभिभावकलाई आदरपूर्वक स्याहार गर्नु सन्तानको नैतिक जिम्मेवारी हो । तर आजभोलि वृद्धाश्रमको संख्यामा वृद्धि हुनु समाजमा अभिभावकप्रतिको दायित्वप्रति गम्भीर सोच आवश्यक भएको संकेत पनि हो । बुवा आमा दिवस एउटा सम्झना मात्र होइन, यो आत्मचिन्तन र उत्तरदायित्वको पनि घडी हो । उनीहरूका अमूल्य बलिदान र निःस्वार्थ मायालाई सम्झँदै, यो दिवसले हामी सबैमा मानवीयता, कृतज्ञता र सेवा भाव झनै प्रगाढ बढाओस् भन्ने कामना गरौं।