पाल्पा, आगामी चैत ५ गते हुने त्रिभुवन विश्वविद्यालय स्वतन्त्र विद्यार्थी युनियन (स्ववियु) को निर्वाचन नजिकिँदै गर्दा क्याम्पसहरुमा चहलपहल बढेको छ । चुनाव आउन १२ मात्र बाँकी छँदा पाल्पासहित देशैभरका मुख्य क्याम्पसमा विभिन्न विद्यार्थी सङ्गठनका चुनाव केन्द्रित गतिविधि बढेका छन् । सङ्गठनहरुले निर्वाचनमा मतदाता आफ्नो पक्षमा पार्नका लागि क्याम्पसमा सहयोगी कक्ष स्थापना गर्ने, विद्यार्थी भर्ना, भेला बैठकजस्ता चुनाव केन्द्रित गरिरहेका छन् ।
विद्यार्थी कल्याण परिषद्को बैठकले निर्वाचन मिति तोकेपछि विद्यार्थी संंगठनहरु चुनावमा होमिएका हुन् । उनीहरुले आफ्नो पक्षमा नतिजा पार्नका लागि प्रचारात्मक कार्यलाई तिव्रता दिएका छन् । स्ववियु निर्वाचनका लागि देशैभरका क्याम्पसहरुमा संघ/संगठनहरू दर्ता समेत भइसकेका छन् ।
विश्वविद्यालयको स्ववियु निर्वाचन केन्द्रीय अनुगमन तथा समन्वय समितिले तय गरेको कार्यतालिका अनुसार नै पाल्पाका क्याम्पसहरुमा पनि संघ/संगठनहरू दर्ता भएका छन् । सबैभन्दा धेरै मतदाता रहेको त्रिभुवन बहुमुखी क्याम्पस तानसेन पाल्पामा ५ वटा संघ संगठन र एउटा समुहले दर्ता गरेका छन् । यहाँ नेपाल विद्यार्थी संघ, अखिल नेपाल स्वतन्त्र विद्यार्थी युनियन, अखिल नेपाल स्वतन्त्र विद्यार्थी युनियन, (क्रान्तीकारी) अखिल नेपाल स्वतन्त्र विद्यार्थी युनियन (समाजवादी), अखिल नेपाल स्वतन्त्र विद्यार्थी युनियन, (छैठौ) र विएसी स्वतन्त्र विद्यार्थी समुहले दर्ता गरेको क्याम्पस प्रमुख टंक प्रसाद पन्थले बताए । यहाँ २ हजारको संख्यामा मतदाता रहेका छन् । यसअघिको स्ववियु निर्वाचनमा सबै संघ संगठनको सयुक्त प्यान निर्वाचित भएको थियो । यसैगरी पाल्पाको दोस्रो ठूलो क्याम्पस सहिद बहुमुखी क्याम्पस रामपुरमा ३ वटा संघ/संगठनले दर्ता गरेका छन् । नेपाल विद्यार्थी संघ, अखिल नेपाल स्वतन्त्र विद्यार्थी युनियन, अखिल नेपाल स्वतन्त्र विद्यार्थी युनियन, (क्रान्तीकारी)ले स्ववियु निर्वाचनको लागि दर्ता गरेको क्याम्पस प्रमुख मुरारीराज काफ्लेले बताए । यस अघिको स्ववियुको प्रत्यक्ष निर्वाचनमा सहिद बहुमुखी क्याम्पस रापुरमा नेविसघं र अखिल क्रान्तीकारी गठबन्धन विजयी भएको थियो । क्याम्पसमा करीव ७ सय मतदाता रहेका छन् ।
यसैगरी माण्डव्य बहुमुखी क्याम्पस दकमडामा २ वटा विद्यार्थी संघ/संगठनले निर्वाचनको लागि दर्ता गरेका छन् । यहाँ अखिल नेपाल स्वतन्त्र विद्यार्थी युनियन र नेपाल विद्यार्थी संघले स्ववियु निर्वाचनको लागि दर्ता गरेको क्याम्पस प्रमुख रुद्र बस्यालले बताए। यस अघि प्रत्यक्ष निर्वाचनमा अनेरास्ववियुको प्यानल निर्वाचित भएको थियो । माण्डव्यमा २ सय मतदाता रहेका छन् ।
यसैगरी उद्वुद्ध कलेज पूर्वखोला पाल्पामा २ वटा संघ संगठनले स्ववियु निर्वाचनको लागि दर्ता गरेका छन् । अखिल नेपाल स्वतन्त्र विद्यार्थी युनियन र नेपाल विद्यार्थी संघले स्ववियु निर्वाचनको लागि दर्ता गरेको क्याम्पस प्रमुख हरि प्रसाद न्यौपानेले बताए । यस अघिको निर्वाचनमा अनेरास्ववियुको प्यानल नै निर्वाचित भएको थियो । क्याम्पसमा १ सय ५० जना मतदाता रहेका छन् ।
निर्वाचनको लागि त्रिभुवन विश्वविद्यालयले यही फागुन १९ गते संघ/संगठन, समुह दर्ता, २१ गते मतदाता सूची प्रकाशित गर्ने, २५ गते मतदाता सूची उपर दाबी विरोध गर्ने, २७ गते प्रत्यक्ष र समानुपातिक दुबै तर्फको नामावली प्रकाशित गर्ने, २९ गते दुबै तर्फको उम्मेदवारको अन्तिम नामावली प्रकाशित गर्ने र चैत्र ५ गते मतदान मिति तोकेको त्रिभुवन बहुमुखी क्याम्पस पाल्पाका स्ववियु निर्वाचन समितिका संयोजक जीवन थापाले बताए । निर्वाचन समितिले निर्वाचनका लागि फागुन २९ गते अपरान्ह २ बजेदेखि चैत्र २ गतेसम्म प्रचार–प्रसारका लागि समय तोकेको छ । त्यसपछि मौन अवधि शुरु हुने पनि समितिले जनाएको छ । चैत ५ गते बिहान ८ बजेदेखि ४ बजेसम्म मतदानका लागि समय तोकिएको छ ।
