तम्घास, गुल्मीको कालीगण्डकी गाउँपालिकामा गत आर्थिक वर्षमा जन्मिएका ५६ छोरीले कूल दुई लाख ८० हजार रुपैयाँ पाएका छन् ।
गाउँपालिकाको आर्थिक वर्ष २०७८÷७९ को नीति तथा कार्यक्रममा छोरी जन्मिए आर्थिक सहायता दिने उल्लेख गर्दै कार्यपालिका बैठकले जन्मिएका छोरीकै नाममा जनही पाँच हजार रुपैयाँ प्रदान गर्ने निर्णय गरेको थियो । त्यसै अनुसार पालिकाले गत आर्थिक वर्षमा पालिकाभित्र जन्मिएका छोरीहरुका लागि पाँच हजार रुपैयाँका दरले कूल दुई लाख ८० हजार रुपैयाँ उपलब्ध गराएको हो । उनीहरुको बैंक खाता खोली रकम बैंकमा नै जम्मा गरिएको छ ।
जन्मदर्ता र वडाको सिफारिसको आधारमा रकम प्रदान गरिएको गाउँपालिकाकी उपाध्यक्ष मञ्जु दर्लामीले जानकारी दिइन् । ‘छोरी भए गर्भपतन गराउने प्रचलन अझै छ ।’ उनले भनिन्, ‘उक्त रकमले छोरीको वृद्धि विकासमा सानो भए पनि सहयोग पुग्नेछ ।’ यो कार्यक्रमलाई चालु आर्थिक वर्षमा पनि निरन्तरता दिन पाँच लाख रुपैयाँ रकम विनियोजन गरिएको उपाध्यक्ष दर्लामीले बताइन् । –रासस