पाल्पा, एक महिना अघिदेखि हराएकी एक युवती कालीगण्डकी नदीमा मृत फेला परेकी छन् । जिल्लाको रम्भा गाउँपालिका–१ अमलीकी २२ वर्षीया अस्मिता विश्वकर्मा शनिबार घर नजिकैको कालीगण्डकी नदीमा मृत फेला परेकी हुन् । वैशाख ११ गते घरमा कोही कसैलाई नसोधी हिडेकी उनी लामो समयसम्म घर नफर्किएपछि परिवारले खोजतलास गरेका थिए ।

युवतीको खोजतलासका लागि परिवारले वैशाख १२ गते प्रहरीमा हुलियासहित निवेदन समेत दिएका थिए । उनलाई खोज्दै जाँदा घरदेखि तीन किलोमिटर टाढा कालीगण्डकी नदी किनारमा मृत अवस्थामा फेला पारिएको प्रहरीले जनाएको छ । के कति कारणले उनको मृत्यु भएको भन्ने विषयमा भने अनुसन्धान भइरहेको जिल्ला प्रहरी कार्यालयका प्रहरी नायव उपरीक्षक बिरेन्द्र थापाले जानकारी दिए । युवतीको शवलाई पोष्टमार्टको लागि रामपुर अस्पतालमा राखिएको छ ।