पाल्पा, जिल्लाको रामपुरमा अवैध बालुवा निकासी गर्ने ट्याक्टरलाई प्रहरीले नियन्त्रणमा लिएको छ । रामपुर–३,निस्दी खोलास्थित रजघर–खयरबोट जोड्ने पुल नजिकै लु ४ त २७९६ नम्वरको ट्याक्टरलाई गिट्टी, बालुवा निकालिरहेकै अवस्थामा प्रहरीले नियन्त्रणमा लिएको हो ।

मापदण्डविपरीत अबैधानिक रुपमा गिट्टी, बालुवा निकालिरहेको अवस्थामा प्रहरी चौकी केलादीको गोस्ती टोलीले ट्याक्टर फेला पारेको जिल्ला प्रहरी कार्यालयले जनाएको छ । ट्याक्टर नियन्त्रणमा लिई प्रहरीले आवश्यक कारवाहीका लागि रामपुर नगरपालिकालाई बुझाएको छ ।

उक्त क्षेत्रबाट पटक–पटक अबैध रूपमा बालुवा, ढुंगा तथा गिट्टी चोरी निकासी हुँदै आएको छ । केही दिनअघि पनि अबैध रूपमा बालुवा चोरी गर्ने तीनवटा ट्याक्टरलाई प्रहरीले नियन्त्रणमा लिएको थियो । रामपुर–२, स्थित निस्दी खोलाबाट प्रहरीले अबैध रूपमा स्वीकृत नलिई बालुवा निकासी गरेको भन्दै चार वटा ट्याक्टरलाई नियन्त्रणमा लिएको हो । प्रहरीले बालुवा चोरी कार्यमा संलग्न लु ४ त ८०६७, लु ३ त ४०४२, लु ३ त ६२६० र लु ३ त ९२३२ नम्बरको ट्याक्टरहरूलाई नियन्त्रणमा लिएको थियो । ति ट्याक्टरलाई पनि आवश्यक कारवाहीका लागि प्रहरीले रामपुर नगर सरकारलाई जिम्मा लगाएको छ ।