पाल्पा, अचेत अवस्थामा भेटिएका तानसेनका एक युवकको मृत्यु भएको छ । आइतबार राती अचेत अवस्थामा भेटिएका तानसेन नगरपालिका १ गैरगाउँका २८ वर्षीय सुदिप अधिकारीको उपचारका क्रममा मृत्यु भएको हो ।

तानसेन नगरपालिका ६ बसपार्क नजिकै आन्दोलनचोक तल अधिकारी अचेत अवस्थामा फेला परेका थिए । उनलाई बाटो हिड्नेहरुले देखेपछि प्रहरीलाई खबर गरेका थिए । खबर लगत्तै अस्थायी प्रहरी विट बसपार्कको प्रहरी टोलीले उनलाई उपचारका लागि जिल्ला अस्पताल पुर्‍याएको थियो । उपचारका क्रममा उनको मृत्यु भएको जिल्ला प्रहरी कार्यालयका प्रहरी निरीक्षक लक्ष्मण पचभैयाले एनजेडीलाई जानकारी दिए । उनका अनुसार घटनाको थप अनुसन्धान भइरहेको छ ।