पाल्पा, जिल्लाका छुट्टाछुट्टै स्थानमा भएका घटनामा दुई जनाको मृत्यु भएको छ । रैनादेवी छहरा गाउँपालिका र रम्भा गाउँपालिकाका दुई छुट्टाछुट्टै स्थानमा भएका घटनामा दुई जनाको मृत्यु भएको हो ।

रम्भा गाउँपालिका–२, सुरुमडाँडामा मोटरसाइकल दुर्घटना हुँदा एक जनाको मृत्यु भएको छ । हुँगीबाट ताहुँतर्फ जाँदै गर्दा लु ६७ प ४७८५ नम्बरको मोटरसाइकल दुर्घटना हुँदा चालक २३ वर्षीय रवीन दमै (छिनाल) को मृत्यु भएको हो । मोटरसाइकल आफै अनियन्त्रित भई सडकदेखि २ सय मिटर तल खस्न पुग्दा छिनालको घटनास्थलमै मृत्यु भएको जिल्ला प्रहरी कार्यालयले जनाएको छ । मोटरसाइकल बिहीबार साँझा दुर्घटना भएको थियो । पूर्वी रुकुमको भुमे गाउँपालिका–४ स्थायी घर भएका मृतक छिनाल रम्भा गाउँपालिका पाल्पामा भूकम्प प्रभावित क्षेत्र हेर्ने इञ्जिनियरका रुपमा कार्यरत रहेको बुझिएको छ । घटनाको विषयमा थप अनुसन्धान भइरहेको जिल्ला प्रहरी कार्यालयका सूचना अधिकारी प्रहरी नायव उपरीक्षक रामेश्वर त्वातीले जानकारी दिए । यस्तै जिल्लाको रैनादेवी छहरा गाउँपालिका २ मा ५८ वर्षीय पुरुषको शव फेला परेको छ । सोही ठाउँका ५८ वर्षीय नरबहादुर रानाको शव फेला परेको हो । रैनादेवी छहरा गाउँपालिकाको आरीमगैरास्थित तानसिंगलदेखि सर्देवातर्फ जाने कच्ची सडक खण्डदेखि २ सय ५० मिटर तल राना मृत अवस्थामा फेला परेको जिल्ला प्रहरी कार्यालयका सूचना अधिकारी प्रहरी नायव उपरीक्षक त्वातीले जानकारी दिए ।