पाल्पा,  पर्यटन व्यवसायी श्याम कक्षपतिको निधन भएको छ । बैंककको एक अस्पतालमा उपचारका क्रममा उनको सोमबार निधन भएको पारिवारिक स्रोतले जनाएको छ ।

लामो समयदेखि मुखको क्यान्सरबाट पीडित कक्षपति करिब दुई महिना अगाडि उपचारका लागि बैंककको बु्रमुनगार्ड अस्पतालमा भर्ना भएका थिए । पाल्पाबाट व्यवसायी सुरु गरेका उनी होटल व्यवसायी हानका पूर्वअध्यक्ष समेत थिए । 

नेपालमा क्याफे संस्कार ल्याउने कक्षपति नाग्लो ग्रुपका संस्थापक पनि थिए । बेकरी क्याफे चेन रेष्टुराँ खोलेर ममःलाई ब्राण्डिङ गर्नमा पनि उनको महत्वपूर्ण योगदान रहेको छ । लामो किमोथेरापीपछि स्वास्थ्यमा सुधार आए पनि उनलाई बचाउन नसकिएको पारिवारिक स्रोतले जनाएको छ । उनको निधनले नेपालको सिंगो पर्यटन क्षेत्रमा क्षति पुगेको छ । दिवंगत कक्षपतिप्रति पाल्पाली व्यवसायीहरुले दुख व्यक्त गरेका छन् ।