पाल्पा (माथागढी),  माथागढी गाउँपालिका ३ को वडा सदस्य स्व. निलकुमारी ठाडाको स्मृतिमा निर्माण गरिएको भवन उद्घाटन गरिएको छ । उक्त २ कोठे निर्मित भवनको गाउँपालिका अध्यक्ष सन्तोष थापा मगरले एक औपचारिक कार्यक्रमका बिच उद्घाटन गरेका हुन् । भवनको उद्घाटन गर्दै अध्यक्ष थापाले गाउँपालिकाले एकजना असल सदस्य गुमानु परेको भन्दै दुख व्यक्त गरे । आफ्नो सहकर्मीलाई गुमानु परेको समस्या र पीडासँगै उनको सम्झनामा बनाइएको यो भवनले उनलाई सधैं हामी माझ राख्ने उनले बताए । ठाडा हामीसँग भौतिक रुपमा नभए पनि सम्झनामा सधैं अमर रहने अध्यक्ष थापाले बताए । उनले स्व. ठाडाले आफ्नो वडाका विकासका लागि देखेको सपना र मतदाता समक्ष गरेको बाचा पालिकाले पूरा गर्ने प्रतिवद्धता समेत व्यक्त गरे । ठाडाको ४० वर्षको उमेरमा २०७६ भदौ १९ गते निधन भएको थियो । गाउँपालिकाकी उपाध्यक्ष निर्मला भट्टराईले आफ्नो सहकर्मी गुमाउँदा निकै पिडाबोध भएको बताईन् । उनले ठाडाको स्मृतिमा भवन बन्नु आफैमा राम्रो भएको धारणा व्यक्त गरिन् ।

प्रमुख प्रशासकीय अधिकृत राजु नेपालले पनि दुख व्यक्त गर्दै आफ्नो कार्यकाल सुरु नहुँदै मृत्यु भए पनि स्मृति भवन भने आफ्नो कार्यकालमा बनेको हुदाँ सम्झनामा सधैं रहने बताए । ३ का वडा अध्यक्ष दिपक थापाले आफ्नो सहकर्मी साथी गुमाउनुपर्दाको पिडा रहेको भन्दै स्व.ठाडाको भवन बनाउने इच्छा आफुहरुले पुरा गरेको बताए । कार्यक्रममा कार्यपालिका सदस्य तारा रसाइलीले पनि स्व. ठाडाको सपनालाई आफुहरुले पुरा गर्ने बताइन् । कार्यक्रममा भवन बनाउन जग्गा सहयोग गर्ने टुन्टी ठाडा जग्गादातालाई सम्मान समेत गरिएको थियो । कार्यक्रम भवन निर्माणका अध्यक्ष कुलबहादुर घर्ती मगरको अध्यक्षता, एलिना घर्ती मगरको स्वागत र तेज घर्ती मगरको सञ्चालनमा कार्यक्रम भएको थियो ।