पाल्पा, नेपाली रेडियो नेटवर्कका समाचार निर्देशक तथा राष्ट्रिय समाचार समिति (रासस)का उपसम्पादक जीवन भण्डारी सम्मानित भएका छन् । लघुवित्त संघ नेपालले पत्रकारिताको माध्यमबाट लघुवित्त क्षेत्रमा योगदान पुर्‍याएको भन्दै पत्रकार भण्डारीलाई एक भव्य समारोहका बिच काठमाडौंमा सम्मान गरेको हो । दुई दशक लामो समयदेखि पत्रकारिता क्षेत्रमा सक्रिय भण्डारीलाई अर्थ सचिव शिशिर ढुङ्गानाले सम्मान गरेका हुन् ।

स्थायी घर पाल्पा भएका भण्डारी लामो समयदेखि काठमाडौंमा रहेर विग मिडियामा काम गर्दै आएका छन् । अनलाइन टीभी पत्रकार संघको अध्यक्ष समेत रहेका भण्डारीले सम्मानपछि शित्तलपटी डटकम/एनजेडीसँगको कुराकानीमा सम्मान आफ्नो लागि मात्र नभएर सिङ्गो नेपाली पत्रकारिता जगतको भएको बताएका छन् । उनले आर्थिक, राजनितिक र साहित्यक क्षेत्रको विकृति विसंगतीका विरुद्धमा खरो रुपमा कलम चलाउदै आएको पाइन्छ ।

भण्डारीसँगै लघुवित्त क्षेत्रका अरु ६ जनालाई पनि सम्मान गरिएको छ । सम्मानित हुनेहरुमा निर्धन उत्थान बैंकका प्रमुख कार्यकारी अधिकृत जनार्दनदेव पन्त, फस्ट माइक्रोफाइनान्सका प्रमुख कार्यकारी अधिकृत नुमनाथ पौडेल, त्रिभुवन विश्वविद्यालयका उपप्राध्यापक भरतसिंह थापा र लघुवित्त वित्तिय संस्थामा सेवाग्राहीको रुपमा आवद्ध तीन महिलाहरु सम्मानित भएका छन् ।