पाल्पा, हिन्दू धर्मावलम्बीले आज सोमबार राधाष्टमी व्रत तथा गोरखकाली पूजा मनाउँदैछन् । प्रत्येक वर्ष कार्तिक कृष्ण अष्टमीका अवसरमा मनाइने यस पर्वमा भगवान् श्रीकृष्णकी प्रिय राधाको विशेष पूजा आराधना गर्ने धार्मिक परम्परा रहेको छ ।

धार्मिक मान्यताअनुसार राधा प्रेम, भक्ति र समर्पणकी प्रतीक मानिन्छिन् । राधा र कृष्णको सम्बन्धलाई निःस्वार्थ प्रेम र आध्यात्मिक भक्तिको उदाहरणका रूपमा लिने गरिन्छ । यस दिन व्रत बसी राधा–कृष्णको पूजा आराधना गरेमा मनोकामना पूरा हुने तथा जीवनमा सुख, शान्ति र समृद्धि प्राप्त हुने धार्मिक विश्वास छ ।राधाष्टमीका अवसरमा भक्तजनले बिहानै स्नान गरी शुद्ध भएर व्रत बस्ने, भगवान् राधा–कृष्णको प्रतिमामा फूल, अक्षता, फलफूल तथा नैवेद्य चढाउने र भजनकीर्तन गर्ने प्रचलन छ । कतिपय स्थानमा धार्मिक प्रवचन तथा विशेष पूजाका कार्यक्रमसमेत आयोजना गरिन्छन् ।

यस पर्वले प्रेम, सद्भाव, समर्पण र आध्यात्मिक चेतनाको सन्देश दिने धार्मिक विश्वास गरिन्छ । राधा र कृष्णको आराधनासँगै परिवारमा सुख, शान्ति र आपसी सम्बन्ध सुमधुर बनोस् भन्ने कामना गर्दै भक्तजनले यो पर्व मनाउने गर्छन् । धार्मिक विश्वासअनुसार राधाको स्मरण र आराधनाले मानिसमा प्रेम, करुणा, धैर्य र समर्पणको भावना विकास गराउँछ । राधा र कृष्णको प्रेमलाई भौतिक आकर्षणभन्दा माथि उठेको आध्यात्मिक प्रेमका रूपमा व्याख्या गरिन्छ । त्यसैले यो पर्व धार्मिक आस्था मात्र नभई मानव जीवनमा प्रेम, सद्भाव र निःस्वार्थ भावनाको महत्व बुझाउने अवसरका रूपमा पनि लिइन्छ । यसरी राधाष्टमी व्रतले धार्मिक तथा सांस्कृतिक परम्पराको संरक्षण गर्नुका साथै नयाँ पुस्तालाई मौलिक संस्कार र आध्यात्मिक मूल्यसँग जोड्न सहयोग पुर्‍याउँदै आएको छ ।