सत्तामा पुग्ने जो कोही दलहरुको एउटै उद्देश्य रहन्छ सत्ता कसरी टिकाउने । पटक–पटक बनेका सरकारहरुले यस्तै अभ्यास गर्दै आए । अहिले पनि देशका दुई ठूला राजनीतिक दलहरु  मिलेर बनेको गठबन्धन सरकार  पनि सत्ता जोगाउन मै व्यस्त छ । उनीहरु सत्ता जोगाउने खेलमा लागि रहेका बेला राजावादी तत्वहरु भने व्यवस्था नै कमजोर बनाउने रणनीतिमा लागेको पाइन्छ । अहिले मुलुकले अभ्यास गरिरहेको संघीय लोकतान्त्रिक गणतन्त्रात्मक प्रणाली हो । यो राजनीतिक प्रणालीभित्र रहेर मुलुकको राजनीति चलिरहेको छ । तर राजनीतिक प्रणालीको हिसाबले इतिहास भइसकेका पूर्वराजा ज्ञानेन्द्र शाहले बेलाबखत दिने अभिव्यक्तिले भने मुलुकको राजनीति तरंगित भइरहेको छ । पूर्वराजाको अभिव्यक्तिमाथि टीकाटिप्पणी र क्रिया–प्रतिक्रिया व्यक्त भइरहेका छन् । यसले व्यवस्थालाई नै धरापमा पार्ने सम्भावना बढेर गएको छ । पूर्वराजाको अभिव्यक्ति आउनु र यसमाथि टीकाटिप्पणी गर्नुलाई राजनीतिक हिसाबले स्वाभाविक भने पनि यो अवस्था सिर्जना हुनुले व्यवस्थाका पक्षधरहरुको कमजोर मानसिकता झल्काउँछ ।

आज दलीय व्यवस्थाका कारण जसलाई जे मन लाग्यो त्यो बेपरवाह भन्न पाइरहेको अवस्था छ । हिजो पूर्वराजा ज्ञानेन्द्रले दलमाथि प्रतिबन्ध लगाउँदै शासन चलाउने क्रममा देखाएको व्यवहार आज पनि आम नेपाली जनताले नदेखको वा नभोगेको होइन, तर पनि अहिले राजसंस्थाको पक्षमा जनता खुल्दै जानुले अहिलेको व्यवस्था कमजोर भएको त होइन ? भन्ने प्रश्न जन्मेको छ । जे भए पनि संसदीय व्यवस्थाको विकल्प राजसंस्था हुन सक्दैन । त्यसैले अहिलेको यो व्यवस्थालाई चलाउनेहरुमा देखिएको बेथिति र विसंगतिलाई कसरी हटाउन सकिन्छ भन्नेतर्फ लाग्नु उचित हुन्छ । अहिले आम सर्वसाधारण निराश छन् । मुलुकमा भविष्य नदेखेर दिनहुँ हजारौँ मानिस युरोप, अमेरिकादेखि खाडी मुलुकमा अध्ययन र काम गर्न गइरहेका छन् । नीतिगत भ्रष्टाचारले राज्यका संयन्त्रहरु जर्जर बनेका छन् । राज्य संयन्त्र बिचौलियाको चंगुलमा रहेको छ । अहिलेको स्थिति देखा पर्नु पूर्वराजाकै कारणले नभई दलहरुले राम्ररी राज्य सञ्चालन गर्न नसकेको परिणतिबाट जन्मिएको हो ।  तसर्थ  सत्ता जोगाउने भन्दा पनि जनतामा आशा जगाई वर्तमान व्यवस्थालाई बलियो बनाउने दिशामा सरकार र राजनीतिक दलहरु लाग्न जरुरी छ ।