पाल्पा, जिल्लाको तिनाउ गाउँपालिकाले दुई वटा वडा कार्यालय भवनको शिलान्यास गरेको छ । गाउँपालिकाले वडा नं. ४ को सत्यवती र वडा नं. ५ को चरचरेमा वडा कार्यालय भवनको शिलान्यास गरेको हो । भवनको गाउँपालिका अध्यक्ष ओमबहादुर घर्तीले शिलान्यास गरेका हुन् । भवनको शिलान्याससँगै आगामी आर्थिक वर्षमा सक्ने गरी निर्माणको काम अगाडि बडेको छ । भवनको शिलान्यास गर्दै गाउँपालिका अध्यक्ष घर्तीले साँघुरा कोठाबाट वडाका कार्यलयका कार्यसम्पादन गर्नुपर्दा समस्या उत्पन्न भएकाले स्थानीयहरुको सहयोगमा वडा कार्यालयको भवन निर्माण गर्न लागिएको बताए । उनले भने ‘आउँदो आर्थिक वर्षमा काम सक्ने गरी निर्माण कार्य अगाडि बढ्ने छ ।’

भवन निर्माणको लागत ६५/६५ लाख रहेको छ । वडा कार्यालयको भवन निर्माणका लागि स्थानीय लाल बहादुर दर्लामी, प्रेम श्रेष्ठ, विष्णु थापा र वडा ५ का वडा अध्यक्ष दलबहादुर दर्लामीले जग्गा सहयोग गरेका थिए । सहयोगीदाताहरुलाई गाउँपालिका अध्यक्ष घर्तीले धन्यवाद व्यक्त गरेका छन् । वडा नं. ३ झुम्सा र वडा नं. ६ मस्याममा पनि आर्थिक बर्ष २०७७/७८ मा कार्यालय भवन निर्माणको काम शुरु गरिने अध्यक्ष घर्तीले जानकारी दिए ।