पाल्पा, शितलपाटी डटकमले ‘सिद्धबाबा सुरुङमार्गका कामदारले तीन महिनादेखि पाएनन् ज्याला’ शिर्षकको समाचार प्रकाशन गरेको केही समयमै कामदारले एक महिनाको पारिश्रमिक पाएका छन् । उनीहरुले समाचार आएको केही घण्टामै आफुहरुको मोवाइलमा एक महिनाको पारिश्रमिकको म्यासेज आएको बताए ।

नाम नबताउने सर्तमा एक कामदारले शितलपाटीसँगको कुराकानीमा भने‘ हजुरहरुको मिडियामा समाचार आएको हामीले थाहा पायौं, त्यसको केही समयपछि हाम्रो मोवाइलमा पैसाको म्यासेज आयो, हेर्दा एक महिनाको  पैसा राखिएको रहेछ ।’ उनले कम्पनीले तीनै  महिनाको पैसा राखिदिने  आश्वासन देखाएकाले साँझादेखि पुनः काममा फर्किने बताए । पटक–पटक पारिश्रमिक माग गर्दा पनि निर्माण कम्पनीले समयमा तलव नदिदा घरखर्च चलाउन समस्या भएपछि यहाँका कामदारहरुले आजदेखि अनिश्चितकालीन रुपमा हड्ताल सुुरु गरेका थिए ।

निर्माण कम्पनीका दोभासे, तथा सुपरभाईजर अभिषेक शर्माले पनि क्रमशः कामदारहरुको पारिश्रमिक आउने बताए । कम्पनीले २ सय ५० जना नेपाली कामदारहरुलाई समयमा भुक्तानी दिन आलटाल गरेका कारण उनीहरु हड्तालमा उत्रिएका थिए । एकातिर कामदारहरुले काम गर्न छोड्नुु र अर्कोतर्फ समाचार बाहिर आउन थालेपछि कम्पनीले कामदारलाई विश्वस्त पार्न पारिश्रमिक हाल्न थालेको स्रोतले जनाएको  छ ।