नेपाल पर्यटन क्षेत्रमा सम्भावना बोकेको मूलुक भए पनि त्यसको विकास हुन सकेको छैन । अब पर्यटन क्षेत्रको विकासका लागि नयाँ ढंगले नलाग्ने हो भने मुलुकको विकास सम्भव छैन् । अहिलेको आवश्यकता भनेको कृषि पर्यटन हो । पर्यटनलाई कृषिसँग जोडेर अगाडि बढाए मात्र देशको विकास सम्भव छ । कृषि र पर्यटनको आ–आफ्नै महत्व छ । दुबैलाई एकै ठाउँमा समन्वय गरेर विकास गर्ने हो भने गाउँघरमा कृषि र पर्यटन दुबैको विकास हुन्छ । ग्रामीण क्षेत्रमा पर्यटनको विकासले गति लिदै जान्छ । पर्यटन उद्योग नेपालको राजस्वको मुख्य स्रोत हो ।

 मनोरञ्जन, धार्मिक, पदयात्रा, साहसिक यात्रालगायत विभिन्न प्रकारका पर्यटन क्षेत्र नेपालमा छन् । त्यसैगरी कृषि पर्यटन, समग्र पर्यटनको अर्को क्षेत्र हो । जुन नेपालमा विगत केही वर्षदेखि प्रयोगमा आउन थालेको छ । कृषिलाई पर्यटनसँग जोडेर राम्रो आम्दानी लिन सकिने अनेकौं उपायहरु रहेका छन् । अहिले धेरै ठाउँमा कृषि पर्यटनका प्रयासहरु भएका छन् । यसलाई सकारात्मक रुपमा लिनुपर्छ । गाउँ–गाउँमा होमस्टे अर्थात् घरबास सञ्चालनमा छन् । तराईका केही ठाउँमा कृषि रिसोर्टहरु स्थापना हुने क्रम चलेको छ । कृषिलाई पर्यटनसँग जोड्ने र पर्यटकहरुबाट आयआर्जन गर्न सकिने धेरै बाटाहरु छन् । पर्यटन लोभ्याउन पहाडका खोला किनारामा रेन्वो ट्रउट माछा पालन गर्न सकेमा प्रकृतिको आनन्द लिदै रेन्वो माछाको स्वाद लिन पर्यटकहरु पुग्दछन् । अब कृषि पर्यटनको विकासका लागि जुन स्थानमा जे उत्पादन हुन्छ, त्यही उत्पादनलाई कसरी चिनाउने भन्ने खालको कार्यक्रम प्रत्येक पालिकाहरुले ल्याउन जरुरी छ । कृषि मात्रै होइन, पशुपंक्षीपालन गरी राम्रो आम्दानी मात्रै होइन, प्राकृतिक आनन्दसमेत पर्यटकहरुलाई दिन सकिन्छ । नेपालमा पछिल्लो समयमा कालिजपालन व्यवसाय विस्तार हुँदै गएको छ । कालिजको साथै विभिन्न बहुरंगी कुखुरापालन, फरक–फरक प्रकृतिका पशु पंक्षीपालन गरी पर्यटकहरुलाई आकर्षण गर्न सकिन्छ ।  

कृषि पर्यटनले एकातिर कृषकलाई खाद्यान्न उत्पादन र पशुपालनमा आकर्षित गर्दछ भने गाउँमा जाने पर्यटकहरुलाई अर्गानिक र पोषणयुक्त खानाको स्वादसमेत दिलाउँछ । नेपालको प्राकृतिक भू–धरातल वातावरण एवं सांस्कृतिक जनजीवन, कृषि उर्वरताका विशेषताहरूको आधारमा सूचना र प्रविधिको अधिकतम उपयोगका साथ सामाजिक सेवामूलक व्यवसायमा जोड दिँदै कृषि पर्यटनलाई नयाँ आयामका साथ मुख्य व्यवसायका रूपमा विकास गर्नु आवश्यक छ । यसर्थ ग्रामीण पर्यटकको विकास र स्थानीय सहभागितामा विशेष जोड दिँदै त्यसको ऐतिहासिक, प्राकृतिक तथा सांस्कृतिक सम्पदा एवम् वातावरणको संरक्षण र संवद्र्धन गर्दै ऐतिहासिक स्थलको संरक्षणसँगै स्थानीय बासिन्दाको चाहनाअनुसार कृषि पर्यटन व्यवसायको विकास, विस्तार गर्नु अहिलेको आवश्यकता छ ।