पाल्पा, जिल्लाको तानसेनमा गाडीको ठक्करबाट पैदलयात्रीको मृत्यु भएको छ । तानसेन नगरपालिका–११, सामाकोटस्थित पाल्पा–गुल्मी सडकखण्डमा फोर्स गाडीको ठक्करबाट ४६ वर्षीया सीता गहतराजको शनिबार राति मृत्यु भएको हो ।

बुटवलबाट गुल्मीतर्फ जाँदै गरेको लु २ ख ५६१८ नम्बरको फोर्स गाडीले सडकमा पैदल हिँडिरहेका बेला गहतराजलाई ठक्कर दिएको थियो । गाडीको ठक्करबाट गम्भीर घाइते भएकी गहतराजलाई उपचारका लागि लुम्बिनी मेडिकल कलेज प्रभासमा लगिएकोमा चेकजाँच पछि डाक्टरले मृत घोषणा गरेका जिल्ला प्रहरी कार्यालयका प्रहरी निरीक्षक सन्दीप बेल्बासेले जानकारी दिए । उनका अनुसार गाडी र चालकलाई नियन्त्रणमा लिएर थप अनुसन्धान अघि बढाइएको छ ।