पाल्पा,बालगायक सचिन परियारको निधन भएको छ । त्रिवि शिक्षण अस्पतालमा उपचारका क्रममा बिहीबार बिहान उनको १३ वर्षको उमेरमा निधन भएको हो ।

उपचारमा संलग्न चिकित्सकहरूका अनुसार सचिन परियारको मस्तिष्कमा पानी जम्ने समस्या थियो । उपचार भइरहेकै समयमा उनको मृत्यु भएको हो ।

केछ खबर भनेर सोद्धा ठट्यौंली स्वरमा ठिक छ हजुर, केछ हजुरको खबर भन्दै गुञ्जीने बालगायक सचिनको निधनप्रति आम नेपालीले सामाजिक सञ्जालमार्फत दुख व्यक्त गरेका छन् ।

सचिनले केही चर्चित गीत गाउनुका साथै केही म्युजिक भिडियोमा समेत अभिनय गरेका छन् । कमला घिमिरे, करुणा राई र गोविन्द पौडेलको श्वर रहेको ’वरको छायाँले’ बोलको गीतमा सचिनले राजेश हमालसँग अभिनयसमेत गरेका छन् । हास्य श्रृखला ‘मेरी बास्सै’मा पनि उनले अभिनय गरेका छन् ।

त्यस्तै सचिनको श्वर र अभिनय रहेको ‘ओठ खोलेर’ बोलको गीतको म्युजिक भिडियो झन्डै २ करोड पटक हेरिएको छ । त्यस्तै उनले अस्मिता अधिकारीसँग ‘के छ र हजुर’ बोलको गीतसमेत गाएका छन् । केही वर्षदेखि उनको स्वास्थ्यका बारेमा सामाजिक सञ्जालमा चर्चासमेत भएको  थियो ।