पाल्पा, देशका विभिन्न स्थानमा भएका छुट्टाछुट्टै सवारी दुर्घटनामा ६ जनाको मृत्यु भएको छ । केन्द्रीय प्रहरी समाचार कक्षका अनुसार कपिलवस्तु, दाङ, सर्लाही, मकवानपुर, ललितपुरमा भएका छुट्टाछुट्टै सवारी दुर्घटनामा ६ जनाको मृत्यु भएको हो ।

कपिलवस्तु नगरपालिका–६ सेमरी गाउँस्थित सडकमा ट्याक्टरको ठक्करबाट एक साइकलयात्रीको मृत्युु भएको छ । सेमरीबाट लक्ष्मीनगरतर्फ जाँदै गरेको लु.२ त ९६८५ नम्बरको ट्याक्टरको ठक्करबाट साइकलयात्री सोही ठाउँ बस्ने राजु अन्सारीको छोरा ६ वर्षीय अवरोज अन्सारीको मंगलबार बिहान मृत्यु भएको हो । ठक्करबाट गम्भीर घाइते भएका उनको जिल्ला अस्पताल तौलीहवामा उपचारको क्रममा मृत्यु भएको प्रहरीले जनाएको छ । यस्तै दाङको लमही नगरपालिका–७ पदमिनी खोला नजिकै सडकमा रोकी राखेको लु.१ ख ९३५२ नम्बरको ट्रकमा लु.प्र.०१–००२ प ११४८ नम्बरको मोटरसाइकल ठक्कर खाई सोमबार राति दुर्घटना हुँदा मोटरसाइकल चालक सोही नगरपालिका–४ भुरीपुर घर भएका २६ वर्षीय गणेश चौधरीको मृत्यु भएको छ । दुर्घटनामा गम्भीर घाइते भएका उनको लमही अस्पतालमा उपचारको क्रममा मृत्यु भएको हो ।

यस्तै मकवानपुरको हेटौंडा उपमहानगरपालिका–१ तिरतिरे धारास्थित सडकमा बा.प्र.०३–००२ प ७२६७ नम्बरको स्कुटरलाई बीआर ०५ बिए ०००६ नम्बरको कारले ठक्कर दिँदा स्कुटर चालक हेटौंडा उपमहानगरपालिका–१ चौकीटोल बस्ने ३५ वर्षीय युवराज लामाको मृत्यु भएको छ । दुर्घटनामा गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । साथै दुर्घटनामा घाइते भएकी स्कुटरमा सवार १ जनाको सोही अस्पतालमा उपचार भइरहेको छ ।

उता सर्लाहीको हरिवन नगरपालिका–११ स्थित सडकमा बा.प्र.०२–०२८ प ६५०८ नम्बरको स्कुटर ना.६ त ३०५० नम्बरको ट्याक्टरमा ठक्कर खाई दुर्घटना हुँदा स्कुटर चालक सोही नगरपालिका–८ चापिनी बस्ने २५ वर्षीय कवि रिखाम मगरको मृत्यु भएको छ । दुर्घटनामा गम्भीर घाइते भएका उनको एलएस न्यूरो अस्पताल बारामा थप उपचारको क्रममा मृत्यु भएको हो । यस्तै हरिपुर नगरपालिका–३ स्थित सडकमा ज.२ त ४५२ नम्बरको ट्याक्टरमा बीआर ०५ एक्यू ८७५९ नम्बरको मोटरसाइकल ठक्कर खाई दुर्घटना हुँदा मोटरसाइकल चालक कविलासी नगरपालिका–७ बस्ने १९ वर्षीय चन्दन यादवको मृत्यु भएको छ । दुर्घटनामा गम्भीर घाइते भएका उनको प्रादेशिक अस्पताल मलंगवामा उपचारको क्रममा मृत्यु भएको  हो ।

यस्तै, ललितपुर,गोदावरी नगरपालिका–३ मोतिचौरस्थित सडकमा लुम्बिनी प्रदेश–०१–००२ प ६६६३ नम्बरको मोटरसाइकलको ठक्करबाट पैदलयात्री  सोही ठाउँ बस्ने ६० वर्षीय नुरू सिलवालको मृत्यु भएको छ । ठक्करबाट गम्भीर घाइते भएका उनको बिएण्डबि अस्पताल ग्वार्कोमा उपचारको क्रममा मृत्यु भएको प्रहरीले जनाएको छ । उल्लेखीत घटनाहरुको  बारेमा थप अनुसन्धान भइरहेको केन्द्रीय प्रहरी समाचार कक्षले जनाएको छ ।