पाल्पा, जिल्लाको रम्भा गाउँपालिका –३ अगाहाखोलास्थित सिद्दार्थ राजमार्गमा ट्रक दुर्घटना भएको छ । बुटवलबाट पोखरातर्फ जाँदै गरेको लु १ ख ९३५१ नम्बरको ट्रक ब्रेक फेल भई सोमबार राती दुर्घटना भएको हो ।

दुर्घटनामा परी ट्रक चालक रम्भा –३ का २३ वर्षीय भुवन सिंह रानाको मृत्यु भएको जिल्ला प्रहरी कार्यालयका प्रहरी नायव उपरीक्षक सुनिल मल्लले जानकारी दिए । उनका अनुसार गम्भीर घाइते भएका उनलाई  उपचारको लागि लुम्बिनी मेडिकल कलेज प्रभास पठाइएकोमा उपचारको क्रममा मृत्यु भएको हो । 

उक्त ट्रकले सोही दिशातर्फ जाँदै गरेको ना १ क ७१२१ नम्बरको ट्रकलाई पछाडीबाट ठक्कर दिँदा  चालक रानालाई सोही ट्रकमा दाहिने खुट्टा च्यापिएको अवस्थामा प्रहरीले उद्दार गरी हस्पिटल पठाएको  थियो । दुर्घटनामा ना. १ क ७१२१ नम्बरको ट्रकको सह– चालक  स्याङ्जाको वालीङ न.पा. १० का २१ वर्षीय सञ्जित खवास थापाको हातमा समान्य चोट लागेको छ । सोही ट्रकका चालक गुप्त बहादुर गुरुङ  भने सकुशल रहेका छन् । घटनाको विषयमा थप अनुसन्धान  भइरहेको जिल्ला प्रहरी कार्यालयले जनाएको छ ।