पाल्पा, जिल्लाको पहिलो सामुदायिक क्याम्पस  तानसेन बहुमुखी क्याम्पस ३६ वर्षको यात्रामा प्रवेश गरेको छ । २०४७ असार १९ गते त्रिभुवन बहुमुखी क्याम्पसको पुरकको रुपमा स्थापना भएको क्याम्पसले ३६ वर्षको यात्रा तय गरेको हो ।

व्यवहारिक, जीवनोपयोगी, वैज्ञानिक र नैतिक मूल्य बोध गराउने शिक्षाको मान्यता राखी क्याम्पसको स्थापना भएको थियो । यो यात्रामा क्याम्पसले आफुलाई नेपालकै प्रतिष्ठित र उत्कृष्ट शैक्षिक संस्थाको रुपमा पहिचान बनाउन सफल भएको छ । त्यसबेला धेरैले विश्वास नगरेको विषय थियो पाल्पामा सामुुदायिक तवरबाट स्थापित क्याम्पस ३६ वर्षसम्म खडा हुनेछ तर धेरैको आकलनलाई गलत सावित गर्दै तानसेन बहुुमुुखी क्याम्पसले आफ्नो ३५ वर्षे यात्रा पार गर्न सफल भएको छ । कक्षा ११ देखि स्नाकोत्तरमा शिक्षा, व्यवस्थापन र मानविकी संकायको शैक्षिक कार्यक्रम विकासमा यस क्याम्पसको ठूलो योगदान रहेको छ । अहिले क्याम्पस सामुदायिक शैक्षिक अनुसन्धान केन्द्र बन्ने बाटोमा अगाडि बढीरहेको छ । ३६ वर्षमा प्रवेश गरेको खुसीयालीमा क्याम्पसले विभिन्न कार्यक्रमहरुको आयोजना गरी वार्षिक उत्सव मनाएको छ । क्याम्पसले  शुक्रबार एक औपचारिक समारोहकाबिच वार्षिक उत्सव तथा क्याम्पस सभा गरेको हो । कार्यक्रमको प्रमुख अतिथि तथा तानसेन नगरपालिकाका नगर प्रमुख सन्तोषलाल श्रेष्ठले उद्घाटन गरेका हुन् । कार्यक्रमको उद्घाटन गर्दै नगर प्रमुख श्रेष्ठले जिल्लाको शैक्षिक क्षेत्रमा क्याम्पसले पुर्‍याएको योगदान महत्वपूर्ण रहेको बताए । उनले पछिल्लो समय सामुदायिक क्याम्पसहरु सञ्चालनमा कठिनाई आएको व्यापक गुनासो आउने गरेको भन्दै त्यसतर्फ नगर सरकारले विशेष ध्यान दिएको बताए । उनले नगरका क्याम्पसहरुका लागि नगर सरकारले आवश्यक सहयोग गर्ने प्रतिवद्धता समेत व्यक्त गरेका छन् ।

 नगरपालिकाले शिक्षा क्षेत्रलाई प्राथमिकतामा राखेर काम गर्दै आएको समेत नगर प्रमुख श्रेष्ठले बताए । विशिष्ट अतिथि पूर्व उद्योग मन्त्री सोमप्रसाद पाण्डेले  पश्चिम क्षेत्रलाई लक्षित गरी सामुदायिक क्याम्पसका रुपमा  स्थापना गरिएको क्याम्पसले  पाल्पाको शैक्षिक क्षेत्रमा अतुलनीय योगदान पु¥याएको बताए । उनले क्याम्पसको दिगो विकासका लागि सबै सरोकारवालाहरु सक्रिय भएर  लाग्नुपर्ने बेला आएको बताए । तानसेन नगरपालिका –७ का वडा अध्यक्ष प्रदिप खनालले क्याम्पसको गरिमा जोगाउनुपर्नेमा जोड दिए । निवर्तमान वडाअध्यक्ष मुक्तिराम जिसीले प्राविधिक शिक्षा अहिलेको आवश्यकता रहेको भन्दै त्यसतर्फ ध्यान दिन क्याम्पसलाई आग्रह गरे । पाल्पा उद्योग वाणिज्य संघका अध्यक्ष शैलेन्द्र  भट्टराईले विगतको शिक्षा, स्वास्थ्य र पर्यटनको नारालाई सार्थक  पार्ने दिशामा सबै सरोकारवाला निकाय लाग्नुपर्ने बताए । क्याम्पस व्यवस्थापन समितिका अध्यक्ष राजनप्रसाद पन्तले सबैको सहयोग र साथका कारण क्याम्पस जिल्लाकै प्रतिष्ठित क्याम्पस बन्न सफल भएको बताए । उनले पश्चिम क्षेत्रलाई लक्षित गरी सामुदायिक क्याम्पसका रुपमा क्याम्पस स्थापना गरिएको बताए । अध्यक्ष पन्तले यही पढौं, यही बसौं भन्ने भावनामा ह्रास आएकाले सामुुदायिक क्याम्पसहरु समस्यामा परेको उल्लेख गरे । उनले भने “पछिल्लो समय विद्यार्थीहरु बसाईसराई र विदेश पलायन हुँदा शैक्षिक संस्थाहरु सञ्चालनमा गाह्रो भइरहेको छ ।” अध्यक्ष पन्तले क्याम्पस व्यवस्थापनमा कुुनै पनि समस्या नरहेको तर विद्यार्थी पलायन हुुने प्रवृत्तिले क्याम्पस सञ्चालनमा समस्या सिर्जना भएको बताए । अहिलेको राष्ट्रिय समस्या भएकाले कसरी विद्यार्थी टिकाउने र वृद्धि गर्ने भन्ने विषयमा क्याम्पस व्यवस्थापन समिति अत्यन्त चिन्तित रहेको उनले धारणा व्यक्त गरे । अध्यक्ष पन्तले शैक्षिक संस्थालाई जिवन्त राख्न सबैको सहयोग आवश्यक रहेको बताए ।

प्राध्यापक रामप्रसाद ढकालले क्याम्पसले शैक्षिक उन्नयनमा महत्वपूर्ण भूमिका खेलेको बताए । उनले सरकारको गलत नीतिका कारण विद्यार्थीहरु विदेश पलायनको अवस्था सिर्जना भएको भन्दै त्यसलाई परिवर्तन गर्नु पर्नेमा जोड दिए । नेपाल पत्रकार महासंघ पाल्पाका अध्यक्ष कमलराज तिमिल्सेनाले पश्चिम नेपालमै क्याम्पसले छुुट्टै ब्राण्ड बनाउन सफल भएको बताए । उनले अहिलेको समय प्राविधि शिक्षाको भएकाले प्राविधिक  धारको शिक्षा सञ्चालनमा ध्यान दिन क्याम्पसलाई आग्रह गरे । कार्यक्रममा पूर्व क्याम्पस प्रमुख रामेश्वर बजिमय, क्याम्पस सञ्चालक समितिका सदस्य श्रीकृष्ण पोखरेल, शैक्षिक व्यक्तित्व बुद्धिप्रसाद शर्मा, माण्डव्य बहुमुखी क्याम्पसका क्याम्पस प्रमुख रुद्र प्रसाद बस्याल लगायतले क्याम्पसको सफलताको शुभकामना व्यक्त  गरेका थिए । कार्यक्रममा क्याम्पस प्रमुख  पुष्करराज रेग्मीले  क्याम्पसको वार्षिक प्रतिवेदन प्रस्तुत गर्दै आगामी दिनदेखि प्राविधिक शिक्षाको व्यवस्था गर्दै क्याम्पसलाई सामुदायिक शैक्षिक अनुसन्धान केन्द्रको रुपमा विकसित गर्ने बताए ।

विद्यार्थी संख्या वृद्धिका आकर्षक कार्यक्रमसहित रणनीति तय गरिने, कप्युटर प्रयोगशला, पुस्तकालय एवं ईलाइब्रेरी कक्षलाई अध्याधिक रुपमा सञ्चालन गरिने प्रमुुख रेग्मीले बताए । यस्तै उनले साधारण विषय सञ्चालनका साथै प्राविधिक/प्रविधिमैत्री सीपमुखी कक्षा सञ्चालन गरिने, व्यवस्थापन तथा मानविकी संकायको स्नातकोत्तर तहमा कक्षा थप गर्ने, क्याम्पसमा विद्यार्थीहरुका लागि छात्रवास र प्राध्यापकहरुका लागि आवास गृह निर्माण कार्यका लागि पहल गरिने, त्रि.वि. शिक्षाशास्त्र संकाय अन्तर्गतको तिन सेमेष्टर अधिस्नातक तह (अङग्रेजी र आइ.पि.एम.) कक्षा सञ्चालनका लागि पहल गरिने, त्रिभुवन विश्वविद्यालयबाट सामुदायिक क्याम्पसहरुले थप कार्यक्रमहरु ल्याउन अप्ठेरो परिस्थिति सिर्जना भईरहेको परिप्रेक्ष्यमा अन्य विश्वविद्यालयहरुसंग पनि समन्वय राखि थप कार्यक्रम ल्याउन पहल गरिने योजना समेत रहेको बताए । कार्यक्रममा विभिन्न क्षेत्रमा योगदान पु¥याएका व्यक्तिहरुलाई सम्मान समेत गरिएको थियो । क्याम्पसले पुनराम घिमिरेद्वारा स्थापित ‘पेरी प्राध्यापक सम्मान’ पुरस्कारबाट उपप्राध्यापक सन्तविर बराललाई सम्मान गरेको छ । यस्तै क्याम्पसको संस्थागत विकासमा योगदान पुर्‍याएका संरक्षक डा. रामप्रसाद ज्ञवाली, उपप्राध्यापक पुनराम घिमिरेलाई सम्मान गरिएको छ । सोही अवसरमा क्याम्पसले अतिरिक्त क्रियाकलाप अन्तर्गत विभिन्न विधामा विजयी  हुने प्रतियोगीहरुलाई सम्मान समेत गरेको छ । क्याम्पस व्यवस्थापन समितिका अध्यक्ष राजनप्रसाद पन्तको अध्यक्षता, प्राध्यापक अरुण ज्ञवालीको स्वागत, प्राध्यापक संघका अध्यक्ष श्रीधर कुमार उपाध्यायको सञ्चालनमा कार्यक्रम भएको थियो ।