पाल्पा, नेपाल रेडक्रस सोसाइटी शाखा पाल्पाले ४७ औं वार्षिक साधारणसभा मनाएको छ । उसले तानसेनमा एक औपचारिक कार्यक्रमको आयोजना गरी साधारणसभा मनाएको हो ।

सभाको प्रमुख जिल्ला अधिकारी तोयनारायण सुवेदीले उद्घाटन गरेका हुन् । कार्यक्रमको उद्घाटन गर्दै उनले रेडक्रस पाल्पाले मानवहितमा गरेका कामहरुको चर्चा गरे । प्रजिअ सुवेदीले लामो सघर्ष र मिहिनेत पछी ब्लड बैक सञ्चालनको अन्तिम तयारी भईररहेको खुसी व्यक्ति गरे । आपत विपतमा रेडक्रस पर्यवाची शब्द नै भएकाले रेडक्रसलाई सबैपक्षबाट आवश्यकता अनुसार सहयोग गर्नुपर्नेमा उनले जोड दिए । पाल्पामा ३ वटा ठूला अस्पतालहरु रहेकाले दिनहुँ ब्लडको आवश्यकतालाई परिपुर्ती गर्न रेडक्रस पाल्पाको नयाँ नेतृत्व सक्रिय भएर लागेकोमा प्रजिअ सुवेदीले धन्यवाद दिदै अभियान पुरा नहुँदासम्म काममा खटिन समेत कार्यसमितिलाई अनुरोध गरे । कार्यक्रममा शाखाका मन्त्री केशवराज नेपालले वार्षिक प्रतिवेदन पेश गर्दै पाल्पामा २०२७ सालमा रेडक्रसको स्थापना भएदेखी नै मानव सेवाका कामहरु गर्दै आएको बताए । मन्त्री नेपालले रेडक्रस पाल्पाले ब्लड बैंक सञ्चालनको लागि आर्थिक सहयोग जुटाउन यशस्कर सदस्य, विशिष्ट सदस्यता वितरण खुला गर्दै आएको र यशस्कर सदस्यको लागि १ लाख, विशिष्ट सदस्यको लागि २५ हजार शुल्क तोकिएको बताए । सदस्य पाउने व्यवस्था रेडक्रस पाल्पाले गरेको छ । पाल्पा शाखा अन्तर्गत १९ वटा उपशाखा, ५ जना यशस्कर सदस्य, ७६ जना विशिष्ट सदस्य, १ हजार ४ सय ९० जना आजिवन सदस्य, १ सय ८३ जना साधारण सदस्य, जुनियर तथा युवा रेडक्रस सर्कल गरी ८३ वटा, जुरेस, युरेस सदस्य संख्या ३ हजार ६ सय २९ जना रहेको मन्त्री नेपालले बार्षिक प्रतिवेदन प्रस्तुत गर्दै जानकारी गराए । उनले रेडक्रस पाल्पाले गर्ने भावी कार्यक्रमका बारेमा समेत जानकारी गराएका थिए ।

कार्यक्रममा कोषाध्यक्ष सन्तोष खनालले आर्थिक बर्ष ०८१÷०८२ को १ करोड ६८ लाख ६० हजारको आय व्यय, आगामी आर्थिक बर्षको अनुमानित ८२ लाख ७८ हजार ४ सय बराबरको आय–व्यय प्रस्तुत गरे । कार्यक्रममा रेडक्रस पाल्पाका सभापति बाबुराम कार्कीले ‘म सञ्चालन गर्छु मेरो ब्लड बैंक’ अभियानलाई पुरा गर्न सिङ्गो कार्यसमिती सक्रिय भएर लागेको बताए । व्लड बैक सञ्चालनको लागि अझै पनि पर्याप्त रकम संकलन हुन नसकेकाले सबैलाई सहयोग गर्न सभापती कार्कीले अनुरोध गरे । ब्लड बैक सञ्चालनको लागि आवश्यक सरसमान खरिदको लागि तानसेन नगरपालिकाबाट टेण्डर भईसकेको छ । अब एक महिना सम्ममा रेडक्रस भवनमा सञ्चालन हुनेछ भने लायन्स धर्मशाला नजिकै ब्लड बैकको लागि भवन निर्माणको काम शुरु भएको छ । साधारणसभाको अवसरमा स्वयम्सेवक सञ्जीत थापा र गणपती मा.वि यूवा रेडक्रस सर्कल तथा साधारणसभामै विशिष्ट सदस्य बनि सहयोग गरेका भेषराज तिमिल्सेना, मिन प्रसाद बञ्जाडे, हरि प्रसाद पोखरेल, हरिबहादुर कुवँर र यक प्रसाद श्रेष्ठलाई सम्मान गरिएको थियो । कार्यक्रममा निवर्तमान् सभापति बुद्धि प्रसाद शर्मा, विशिष्ट अतिथी, मेघराज पौडेल शर्मा, रैनादेवी छहरा उपशाखाका सभापति काशीराम पौडेल र मणिमुकुन्द उपशाखाका सभापति शकुन्तला बज्राचार्य, नेपाल पत्रकार महासंघ पाल्पाका अध्यक्ष कमलराज तिमिल्सेनाले रेडक्रस पाल्पाले गरेका सेवा तथा कार्यहरुको बारेमा चर्चा गरेका थिए । शाखा सभापति बाबुराम कार्कीको अध्यक्षता, उपाध्यक्ष भिमसेन कार्कीको स्वागत, शाखा अधिकृत विनोद भारतीको सञ्चालनमा भएको थियो ।