पाल्पा, डिजिटल अभ्यास र डाटा सुरक्षा अवस्था पहिचान सम्बन्धी तानसेनमा अन्तर्क्रिया कार्यक्रम भएको छ । पुरक एशिया काठमाडौं र पाल्पा विकास केन्द्रको संयुक्त आयोजनामा अन्तर्क्रिया भएको हो ।
कार्यक्रममा तानसेन नगरपालिकाका नगर प्रमुख सन्तोषलाल श्रेष्ठले डिजिटल प्रविधिको विकाससँगै जोखिम पनि उत्तिकै बढ्दै गएकोले प्रविधिको बारेमा ज्ञान सबैमा हुन जरुरी रहेको बताए । उनले व्यक्तिगत जानकारीदेखि व्यावसायिक गोपनीयतासम्म, सरकारी अभिलेखदेखि स्वास्थ्यसम्बन्धी विवरणसम्मका सबै कुरा डिजिटल रूपमै सुरक्षित गर्न थालिएकाले पनि प्रयोगकर्ताहरुमा प्रविधिको ज्ञान हुन आवश्यक रहेको उल्लेख गरे । नगर प्रमुख श्रेष्ठले डिजिटल र डाटा सुरक्षाको सवाल चुनौतिको विषय भएकाले त्यसतर्फ केन्द्रीय सरकारले नै ध्यान दिनुपर्नेमा जोड दिए ।
नगरपालिकाका प्रमुख प्रशासकिय अधिकृत पिताम्बर पाण्डेले डाटा सुरक्षाको महत्व जति बढेको छ चुनौती पनि त्यत्तिकै जटिल बन्दै गएको भन्दै त्यसको समाधानका लागि सबैले ध्यान दिनुपर्ने बताए । उनले भने ‘सरकारी संस्थाहरूले नागरिकको व्यक्तिगत डाटा मात्र होइन राष्ट्रिय सुरक्षासम्बन्धी संवेदनशील सूचना पनि डिजिटल भण्डारण गर्छन् । यस्तोमा यदि सरकारी तहमा डाटा चुहावट हुन्छ वा साइबर हमला भएमा राष्ट्रिय सुरक्षामा खतरा आउन सक्छ । नेपालमा साइबर सुरक्षा नीति तथा डाटा सुरक्षाको प्रभावकारी कार्यान्वयन गर्दा राष्ट्रिय सुरक्षालाई थप मजबुत बनाउन सकिन्छ ।’
कार्यक्रममा नगरपालिकाका प्रवक्ता यादव सिं कार्की, त्रिभुवन बहुमुखी क्याम्पसका क्याम्पस प्रमुख टंक पन्थ, नगरपालिकाका लेखा शाखा प्रमुख कोसलराज घिमिरे, सूचना अधिकारी भरत आचार्य, राजस्व शाखाका प्रमुख मधुसुदन घर्ती, सूचना तथा प्रविधि शाखाका प्रकाश गैरे, सुदिप पौड्याल, पाल्पा उद्योग वाणिज्य संघका कार्यकारी निर्देशक सुशिल प्रधान, पत्रकार मुक्ति न्यौपाने लगायतले डिजिटल र डाटा सुरक्षाको विषय अत्यन्त संवेदनशील भएकाले सबैले ध्यान दिनुपर्नेमा जोड दिए ।
प्रदेश सरकार र स्थानीय तहमा डाटाको गोपनीयता र सुरक्षाका लागि डिजिटल नीति बनाउन प्रोत्साहित गर्ने, डाटाको सुरक्षित व्यवस्थापन र प्रयोगको लागि सरकारी अधिकारी र व्यक्तिहरूलाई सशक्त बनाउने, डिजिटल साक्षरता र सुरक्षा उपायहरूका बारेमा सचेतना फैलाउने उद्देश्यले डिजिटल अभ्यास र डाटा सुरक्षा अवस्था पहिचान सम्बन्धी अन्तक्र्रिया कार्यक्रम गरिएको पाल्पा विकास केन्द्रका कार्यक्रम संयोजक किरण कौसलले बताए । उनले भने ‘हामीले अन्तक्र्रिया कार्यक्रममार्फत प्रदेश सरकार, स्थानीय तह र व्यक्तिहरूले आफ्नो डेटाको उचित व्यवस्थापन तथा संरक्षण गर्न र सुरक्षा उपायहरू सहितको नीति र डिजिटल उपकरणहरूको प्रयोगमा प्रोत्साहन गर्न खोजेका छौं ।’
प्रदेश सरकार र स्थानीय तहको डाटा गोपनीयता, संरक्षण र इन्टरनेट सुरक्षा नीति तयारमा सहजिकरण, प्रदेश सरकार र स्थानीय तहहरूमा डाटा सुरक्षाको वर्तमान अभ्यासहरू पहिचान हुने र राम्रो अभ्यासहरूको बिस्तार र सुधार गर्नुपर्ने पक्षका बारेमा पहल, डिजिटल सुरक्षा उपायहरूको जागरूकताको विकास र विस्तार र सरकारी तथा व्यक्तिगतस्तरहरूमा सुरक्षित डिजिटल अभ्यासहरू र डेटा सुरक्षाको बारेमा सचेतना बृद्धि गर्न कार्यक्रमले महत्वपूर्ण भूमिका खेल्ने संयोजक कौसलले विश्वास व्यक्त गरे । कार्यक्रम लुम्बिनी प्रदेश सरकार, तानसेन नगरपालिका, बुटवल उपमहानगरपालिका र राप्ती गाउँपालिका दाङमा सञ्चालन हुने छ । तानसेनमा भएको कार्यक्रममा आईटी क्षेत्रमा कार्यरत जनशक्ति, सूचना अधिकारीहरू, प्रविधिको बढी प्रयोग गर्ने संस्थाका प्रतिनिधिहरु र सरोकारवालहरुको सहभागीता रहेको थियो ।
