पाल्पा, राष्ट्रिय गौरवको रुपमा रहेको निर्माणधिन सिद्धबाबा सुरुङमार्ग निर्माणको काम गर्दै आएका कामदारले तीन महिनादेखि ज्याला नपाएको गुनासो गरेका छन् । पटक–पटक पारिश्रमिक माग गर्दा पनि निर्माण कम्पनीले डिसेम्वर महिनादेखि नदिएको कामदारहरुले गुनासो गरेका हुन् ।

समयमा तलव नपाउँदा घरखर्च चलाउन समस्या भएपछि यहाँका कामदारहरुले आजदेखि अनिश्चितकालीन रुपमा हड्ताल शुरु गरेका छन् । निर्माण कम्पनीसँग पटक–पटक तलव दिन आग्रह गर्दा पनि वास्ता नगरेपछि आन्दोलन स्वरुप काम रोक्नुपरेको कामदारहरुको भनाई छ ।

कम्पनीले २ सय ५० जना नेपाली कामदारहरुलाई समयमा भुक्तानी दिन आलटाल गरेका कारण आन्दोन गर्नु परेको नाम उल्लेख नगर्ने सर्तमा एक जना कामदारले बताए । ‘घर परिवार पाल्नकै लागि घरदेखि टाढा आएर काम गरेका हौं, गरिबको दुःखमाथि अन्याय भएको छ,’ उनले भने, ‘पैसा आउला भनेर कुर्दा कुर्दै महिनौं बितिसक्यो, सरसापट गरेर पैसाको जोहो गरियो, अहिलेसम्म पैसा आउने कुनै छाँटकाँट नै छैन ।’      

समाचार नलेख्न सम्पादकलाई धम्की

कामदारहरुले ज्याला नपाएर हड्ताल गरेको भन्ने गुनासोका विषयमा बुझ्न खोज्दा  निर्माण कम्पनीका दोभासे, तथा सुपरभाईजर अभिषेक शर्माले शित्तलपाटी डटकमका प्रधान सम्पादक जगदीश भट्टराईलाई यस्तो विषयमा समाचार नलेख्न भन्दै धम्की दिएका छन् । 

शर्माले फोनमार्फत धम्कीको भाषामा भनेका छन् ‘यो समाचार नबनाउँनु होला, यस्तो समाचार बनाउँदा अप्ठ्यारो पर्ला, तपाईलाई कसले भनेको हो ?, भन्नुस् हड्तालका विषयमा जानकारी दिने को हो ? म ठीक पार्छु ।’

पुपरभाईजर शर्माले कम्पनीले बैंकमा ज्याला बापतको रकम कामदारका खातामा पठाइसकेको बताए । उनले भने ‘हामीले कामदारको खातामा पारिश्रमिक पठाइसकेका छौं तर, कम्पनीको खाताबाट बैंकले काटी सकेको भए पनि कामदारका खातामा नगएका कारण एक सय जना कामदारलाई समस्या चाही परेको हो ।’

सुरुङमार्गको  गत महिना बे्रक थ्रु समेत भई सकेको छ । एक हजार १ सय २६ मिटर लामोको सुरुङमार्ग निर्माणका लागि चिनियाँ निर्माण कम्पनी चाइना स्टेट कन्स्ट्रक्सन इन्जिनियरिङ कर्पोरेसनले ०७८ फागुनमा ५ वर्षभित्र सम्पन्न गरी ठेक्का लिएको थियो । ठेक्का रकम ७ अर्ब ३४ करोड २१ लाख रुपैयाँ रहेको छ ।