पाल्पा), जिल्लाको तानसेनस्थित कैलाशनगरमा निर्माणधिन ‘श्रीनगर सांस्कृतिक डबली’ सञ्चालनमा आएको छ । प्रदेश सरकारले तानसेन नगरपालिकालाई हस्तान्तरण गरेको १५ महिनापछि बुधबार डबली सञ्चालनमा आएको हो ।
लुम्बिनी प्रदेश सरकारको लगानीमा निर्माण गरिएको डबली तानसेन नगर सरकारका प्रमुख सन्तोषलाल श्रेष्ठले एक औपचारिक कार्यक्रमकाबिच शुभारम्भ गरेका हुन् । डबली शुभारम्भ गर्दै नगर प्रमुख श्रेष्ठले प्रदेश सरकारले दिएको जिम्मेवारीलाई स्थानीय सरकारले प्रथामिकताका साथ अगाडि बढाएको बताए । डबलीको उचित किसिमले प्रयोग गरी यहाँका कला संस्कृति र पर्यटनको विकास गरिने उनको भनाई छ । तानसेनको कलासंस्कृति र पर्यटनको संरक्षण, प्रवद्र्धन गर्न डबलीले महत्वपूर्ण भूमिका खेल्ने नगर प्रमुख श्रेष्ठले विश्वास व्यक्त गरे । उनले भने ‘तानसेन आफैमा पर्यटकीयस्थल रहेकाले त्यसको विकास र विस्तारका लागि डबली महत्वपूर्ण हुुने छ ।’
डबली ‘ओपन थिएटर’ को अवधारणमा बनेको छ । जिल्लाका विभिन्न जातजाति, समुदायका कला र संस्कृति प्रदर्शन गर्नुको साथै पर्यटकीय क्षेत्रको विकास गर्ने उद्देश्यले प्रदेश सरकारको योजनाअनुसार डबली निर्माण गरिएको हो । डबलीको प्रदेश सरकारका तत्कालिन मुख्यमन्त्री शंकर पोखरेलले शिलान्यास गरेका थिए ।
प्रदेश सरकारको ६ करोड ८२ लाख ५६ हजार ९१ रुपैयाँ बजेटमा डबली निर्माण भएको उपप्रमुख प्रतिक्षा सिंजालीले बताइन् । आर्थिक वर्ष २०७५/०७६ मा तत्कालिन उद्योग पर्यटन वन तथा वातावरण मन्त्रालयको योजना अन्र्तगत डिभिजन वन कार्यालय पाल्पा मातहतबाट डबली निर्माण कार्य अगाडि बढेको थियो । जस अनुसार २०७६ असार ८ गते डबली निर्माणका लागि प्रतिष्ठा कन्स्ट्रक्सन प्रा.लि. काठमाडौंले निर्माणको जिम्मा पाएको थियो । निर्माण कम्पनीले दुई पटक सम्म ६÷६ महिना म्याद थप गरेर २०७९ असार ८ गते काम सम्पन्न गरेको हो । ‘पाल्पाका प्रख्यात नेवारी, मगर संस्कृतिहरु लोप हुने अवस्थामा पुगेका छन् तिनीहरुलाई जीवन्त राख्न डबली सञ्चालनमा ल्याइएको हो’ उपप्रमुख प्रतिक्षा सिंजालीले भनिन् ‘यसले पाल्पाको पर्यटकीय क्षेत्रमा नयाँ आयाम थप्ने छ ।’
वर्षौैँदेखि अलपत्र डबली सम्पन्न गर्न भन्दै प्रदेश सरकारले पटक–पटकसम्म म्याद थप गरे पनि पूर्णता पाउन सकेको थिएन । स्थानीय सरकारलाई हस्तान्तरण पछि डबली निर्माणले पूर्णता पाएको हो । तत्कालिन प्रदेश सरकारका मुख्यमन्त्री डिल्लीबहादुर चौधरीले २०८० मसिर २४ गते उक्त डबलीको साँचो नगर सरकारका प्रमुख सन्तोषलाल श्रेष्ठलाई हस्तान्तरण गरेका थिए ।
स्थानीय सरकारलाई हस्तान्तरण पछि डबली छिट्टै सञ्चालनमा आउने धेरैले आशा गरे पनि अन्ततः १५ महिनापछि मात्र सञ्चालनमा आएको हो । समयमै डबली सञ्चालनमा नआउँदा स्थानीय निराश हुँदै आएका थिए । बुधबार औपचारिक रुपमा सञ्चालनमा आएपछि भने यस क्षेत्रका नागरिक उत्साहित भएका छन् । ढिलाई भए पनि डबली सञ्चालनमा आएकोमा अत्यन्त खुसी लागेको कैलाशनगरका रमेश अधिकारीले बताए । उनले भने ‘आफ्नै टोलमा सांस्कृतिक डबली निर्माण हुुदा टोलको मात्र नभई सिंगो तानसेन नै रमणीय र सुन्दर देखिएको छ ।’ अधिकारीसँगै स्थानीय सुमन भट्टराई पनि डबली सञ्चालनले पर्यटकको आगमन समेत बढ्ने भन्दै खुसी व्यक्त गरे । स्थानीय कलासंस्कृतिको संरक्षण गर्ने उद्देश्यले करोडौंको लगानीमा हिमश्रृखलाको अवलोकन गर्न सकिने ठाउँमा श्रीनगर सांस्कृतिक डबलीको निर्माण भएसँंगै तानसेनवासीमा उत्साह छाएको छ । डबलीमा स्टेज, हरियो दुवो सहितको दर्शक कक्ष, कलाकारहरुको चेन्जिङ्ग रुम, कोलसेट, शौचालय, गार्ड हाउस, टिकट काउन्टर, अफिस कोठा र पार्किङ सहितको सुविधा रहेको छ । यहाँ ५ सय जना अट्ने क्षमता रहेको छ । डबली शुभारम्भको अवसरमा जिल्लामा लोप हुन लागेको सोरठी, झ्याउरे, नेवारी नाँच, थिमेबाजा,जिवाइमाइवा जस्ता नाँचहरु प्रदर्शन गरिनुको साथै, मगरी, नेवारी खाजाका परिकारहरु समेत राखिएको थियो । शुभारम्भ कार्यक्रम उपप्रमुख प्रतिक्षा सिंजालीको अध्यक्षता, सूचना अधिकारी भरत आचार्यको सञ्चालनमा कार्यक्रम भएको थियो ।
