पाल्पा, नेपाली काँग्रेस पाल्पाले ‘१०० दिने विशेष अभियान’ अन्तर्गत भातृ संगठनका पदाधिकारी तथा सदस्यहरु, प्रदेश सभाका महासमिति सदस्य तथा  महाधिवेशन प्रतिनिधिहरु, प्रदेश समिति तथा पालिका समितिका पदाधिकारीहरुको लागि अभिमुखीकरण कार्यक्रम गरेको छ । काँग्रेसले सोमबार पार्टी कार्यालयमा एक दिने अभिमुखीकरण कार्यक्रम गरेको हो ।  कार्यक्रममा नेपाली काँग्रेसका केन्द्रीय सदस्य तथा प्रतिनिधी भरत कुमार शाहले लोकतन्त्रलाई बलियो बनाउन सबै सक्रिय हुन जरुरी रहेको बताए । उनले अभियानका क्रममा जनस्तरबाट उठेका सवालहरूलाई पार्टीले आफ्नो मुद्दा बनाएर अघि बढ्ने प्रतिवद्धता पनि व्यक्त गरे । उनले काँग्रेसको संगठनका गतिविधि चलायमान गराउनु नै अभियानको मुख्य उद्देश्य भएको पनि बताए । 

नेता शाहले पार्टी भित्र देखिएका असन्तुष्टिहरूलाई पनि अभियानले सम्बोधन गर्ने धारणा व्यक्त गरे । केन्द्रीय सदस्य डा. डिला संग्रौलाले लोकतन्त्रको अनुभुति गाउँ गाउँमा गराउन काँग्रेस सक्रिय भएर लागेको बताइन् । उनले काँग्रेस सक्किएर हैन सच्चिएर अगाडि बढेको भन्दै अब तल्लो तहबाटै संगठन बलियो बनाएर लैजान भातृ तथा शुभेचछुक संस्थाका प्रतिनिधिहरुलाई आग्रह गरिन् । नेतृ संग्रौलाले काँग्रेसका कार्यकर्ताहरुलाई उत्पादनसँग जोड्ने गरी काँग्रेसले काम थालेको पनि बताईन् । अर्का केन्द्रीय  सदस्य गोविन्द शाहले पार्टीलाई चलायमान बनाउ भातृ र शुभेच्छुक संस्थाहरु समेत क्रियाशिल बन्नुपर्नेमा जोड दिए । काँग्रेस केन्द्र्रीय सदस्य चम्पा देवी पौड्यालले काँग्रेस कमजोर हुँदा लोकतन्त्र समेत कमजोर बन्ने भएकाले पार्टीलाई बलियो बनाएर लैजाने दिशामा सबै एक  भएर जानुपर्ने बताइन् ।

काँग्रेस पाल्पाका निवर्तमान सभापति तथा लुम्बिनी प्रदेशका सांसद वीरबहादुर रानाले संगठनलाई बलियो र मजबूद बनाएर लैजान सबै तहका नेता कार्यकर्ताहरु सक्रिय भएर लाग्नुपर्ने बताए । उनले १०० दिने अभियानले पार्टी संगठनलाई थप बलियो बनाएर लैजान महत्वपूर्ण भूमिका खेल्ने बताए । उनले निरन्तर जनताको माझमा गएर संगठनसँगै विकासका लागि मेहेनत गरेमा सफलता प्राप्त गर्न सकिने धारणा व्यक्त गरे । काँग्रेस जिल्ला सभापति हिमालदत्त श्रेष्ठले संगठनलाई मजबुत बनाउन वडा टोलसम्मै अभियानलाई तिव्रता दिइएको बताए । उनले जनतामाझ पुगेर पार्टीले गरेका काम र योजनाका बारेमा बुझाउन आवश्यक रहेको औल्याउदै त्यसका लागि आफुहरु १०० दिने अभियान लिएर हिडेको उल्लेख गरे । नेपाल विद्यार्थी संघका कन्द्रीय सदस्य तथा प्रतिनिधि सुनिल बाबु चापागाईले पार्टीका कार्यकर्ताहरूलाई ढुक्क भएर पार्टीले गरेका विकास निर्माण र योगदानको प्रचार–प्रसार गर्दै जनतामाझ जान आग्रह गरे । कार्यक्रममा जिल्ला समितिका आमन्त्रित सदस्यहरु, भातृ संगठनका पदाधिकारी तथा सदस्यहरु, प्रदेश सभाका सम्पुर्ण महासमिति सदस्य तथा  महाधिवेशन प्रतिनिधिहरु, प्रदेश समिति तथा पालिका समितिका पदाधिकारीहरुको उपस्थिती रहेको थियो । जिल्ला सभापति हिमालदत्त श्रेष्ठको  अध्यक्षता, पार्टी प्रवक्ता शोभाकर न्यौपानेको स्वागत, सचिव सुनिता अधिकारीको सञ्चालनमा कार्यक्रम भएको थियो ।