पाल्पा, जिल्लाको रामपुरमा एक महिला मृत फेला परेकी छन् । रामपुर नगरपालिका–३, बगाहादेखि सीताकुण्ड जाने कच्ची सडक खण्डको पश्चिम पट्टी नालीमा सोही ठाँउका डिलबहादुर सारुको श्रीमति ६५ वर्षीय सुकमाया गिरी सारु शनिबार साँझा अचेत अवस्थामा फेला परेकी थिइन् ।

उनलाई स्थानीय र प्रहरीले उद्दार गरी उपचारका लागि रामपुर अस्पतालमा पठाए पनि चेकजाँच गर्दा डाक्टरले मृत घोषणा गरेको जिल्ला प्रहरी कार्यालयका सूचना अधिकारी प्रहरी नायव उपरीक्षक सुनिल मल्लले जानकारी दिए । घटनाको विषयमा थप अनुसन्धान भइरहेको प्रहरीले जनाएको छ । अघिल्लो दिन शुक्रबार यही रामपुर नगरपालिका–५ भम्बकमा पनि अचेत अवस्थामा भेटिएका एक पुरुषको मृत्यु भएको थियो । भम्बकका ५४वर्षीय रामु काफ्ले आफ्नै घर नजिक रहेको गोबर ग्यासको सेफ्टि ट्याङ्की माथि घोप्टोपरी अचेत अवस्थामा फेला पारी उपचारका लागि रामपुर अस्पताल लगिएकोमाचेकजााँचपछि डाक्टरले मृत घोषणा गरेका थिए ।