तानसेन (पाल्पा), स्वास्थ्य तथा जनसंख्या मन्त्री प्रदीप पौडेलले सङ्घीयता खर्चिलो भएकाले छरितो बनाउन आवश्यक रहेको बताएका छन् । शुक्रबार नेपाली काँग्रेस पाल्पाले तानसेनमा आयोजना गरेको शुभकामना तथा सम्मान कार्यक्रमलाई सम्बोधन गर्दै उनले सङ्घीयता राज्यको क्षमता भन्दा बढी खर्चिलो भएकाले छरितो बनाउन आवश्यक रहेको बताएका हुन् ।
मन्त्री पौडेलले भने “वास्तवमा सङ्घीयता जनतालाई अधिकार दिलाउने सन्दर्भमा यो परिस्कृत स्वरुप हो, तर हाम्रो सङ्घीयता राज्यको क्षमता भन्दा बढी बोझिलो, खर्चिलो बनेको स्थिति छ, यसको अर्थ सङ्घीयता समाप्त गर्ने होइन, छरितो बनाउने हो ,हाम्रो शासन संरचनालाई छरितो बनाएर अगाडि बढ्ने हो ।’
सङ्घीय लोकतन्त्रमा धेरै कुरा भएको छ तर पर्याप्त नभएको उनको भनाई छ । “अहिलेको व्यवस्थालाई पूर्णता व्यवस्थित बनाउन आवश्यक छ, नेपाललाई समृद्ध बनाउने दिशामा हामी धेरै अगाडि बढेका छौं, यसले फेरी पछाडी फर्कने अवस्था आयो भने देश धेरै पछाडी जाने अवस्था आउन सक्छ । त्यसैले व्यक्तिको हैन विधिको शासन स्थापित गर्न खोजेका हौं” मन्त्री पौडेलले भने । उनले सङ्घीय शासनलाई नै बलियो बनाएर लैजाने दिशामा लागेको बताए ।
नेपाली काँग्रेसका केन्द्रीय सदस्य समेत रहेका पौडेलले सङ्घीयता छरितो बनाउन अब राजनीतिक संरचना र प्रशासनियक संरचना छरितो बनाएर जानु अहिलेको आवश्यकता रहेको उल्लेख गरे । उनले भने “मैले नेपाली काँग्रेसको केन्द्रीय समितिको बैंठकमा समेत भनेको थिए अब सांसदको सङ्ख्या दुई सय ७५ बाट दुई सय एकमा छारौं, केन्द्रीय मन्त्री मण्डलको सङ्ख्या २५ बाट १५ मा झारौं, प्रदेशको सङ्ख्या एकतिहाई घटाऔं प्रदेशमा एउटा मुख्यमन्त्री, एउटा वित्त मन्त्री, एउटा प्रशासनमन्त्री मात्र राखौं, पालिकाहरुको सङ्ख्या पनि घटाऊ बरु वडाको सङ्ख्या बढाऔं यसरी हामीले खर्चिलो बनेको सङ्घीयता छरितो बनाउन सक्छौं, राजनीतिक संरचनाहरु छरितो भइसकेपछि प्रशासनिक संरचना पनि छरितो बनाउने बाटो खुल्छ ।” कार्यक्रममा काँग्रेसले स्ववियु निर्वाचनमा निर्वाचित विद्यार्थीहरुलाई सम्मान गरेको छ । पार्टी सभापति हिमालदत्त श्रेष्ठको अध्यक्षता, उपसभापति झपेन्द्र गरिहेको स्वागत, सचिव सुनिता अधिकारीको सञ्चालनमा कार्यक्रम भएको थियो ।
