पाल्पा, देशकै जेठो क्याम्पस त्रिभुवन बहुमुखी क्याम्पस तानसेनमा १६ वर्षपछि स्वतन्त्र विद्यार्थी युनियन (स्ववियु)को निर्वाचन भएको छ । प्रत्येक दुई/दुई वर्षमा हुने स्ववियु निर्वाचन २०६५ सालदेखि भने नियमित रुपमा हुनसकेको थिएन । २०७९ सालमा स्ववियुको निर्वाचन भए पनि यहाँ सबै विद्यार्थी सङ्गठनबिच सर्वसम्मत नेतृत्व चयन भएको थियो । तर यस पटक भने निर्वाचनकै माध्यमबाट नेतृत्व चयन हुँदैछ । जसका कारण पनि मतदानमा विद्यार्थीहरूको उत्साहजनक सहभागिता रह्यो । मतदानका लागि बिहानैदेखि विद्यार्थी लाइनवद्ध भएर मतदानमा उत्साहका साथ सहभागी भएका थिए । लामो समयपछि आफैले मतदान गरेर विद्यार्थी नेतृत्व चुन्न पाउँदा खुसी लागेको मतदान गरेर घर फर्कर्दे गरेकी त्रिभुवन बहुमुखी क्याम्पस अध्ययनरत नारायणी गाहाले बताइन् । उनले भनिन् ‘२०७९ को चुनावमा सर्वसम्मत नेतृत्व चयन भएकाले मतदान गर्न पाइएन, यस पटक भने आफ्नो मताधिकार प्रयोग गरियो ।’ विवेक आचार्य पनि यस पटक मतदान गर्न पाउँदा उत्साहित थिए । उनले भने‘ लोकतान्त्रिक व्यवस्थामा निर्वाचनबाट नेतृत्व चुन्न पाउँदा आफैलाई गर्व लाग्दो रहेछ ।’ उनीहरु जस्तै धेरै विद्यार्थीहरु उत्साहजनक रुपमा मतदानस्थलमा पुगेर भोट खसालेका छन् ।

दुई क्याम्पसमा ६९ प्रतिशत मत खस्यो:  अन्तिम मत परिणाम अनुसार यहाँका दुई वटा क्याम्पसमा ६९ प्रतिशत मत खसेको छ । कूल २ हजार ६ सय ७ मतदाता विद्यार्थी रहेकोमा एक हजार ७ सय ९९ मत खसेको हो । यहाँ त्रिभुवन बहुमुखी क्याम्पसमा ६४ दशमलव ८३ प्रतिशत मत खसेको छ । एक हजार ८ सय ९४ जना मतदाता विद्यार्थी रहेकोमा एक हजार २ सय २८ मत खसेको निर्वाचन अधिकृत जीवनबहादुर थापाले बताए । यहाँ १९ पदका लागि निर्वाचन भएको हो । १० पदमा प्रत्यक्ष निर्वाचनबाट नेतृत्व चयन हुनेछ । यस्तै ९ पदमा भने समानुपातिक मतबाट नेतृत्व चयन हुनेछ । प्रत्यक्षतर्फ अध्यक्ष, सचिव, कोषाध्यक्षसहित १० पदमा नेतृत्व निर्वाचित हुने छन् । यस्तै समानुपातिक उम्मेदवारका लागि सङ्गठनलाई मत दिनुपर्ने प्रावधान रहेको छ । सङ्गठनले पाएको मतको आधारमा स्ववियुमा प्रतिनिधित्व हुने छ । यस्तै रामपुरस्थित सहिद बहुमुखी क्याम्पसमा ८० दशमलव ०८ प्रतिशत मतदान खसेको छ । ७ सय १३ जना मतदाता विद्यार्थी रहेकोमा ५ सय ७१ मत खसेको स्थानीय पत्रकार प्रकाश ज्ञवालीले जानकारी दिए । यहाँ प्रत्यक्षतर्फ नेपाल नेविसङ्घ, अनेरास्ववयिु र अनेरास्वववियु क्रान्तिकारीको संयुक्त प्यानल चुनावी प्रतिस्पर्धामा छन् । १५ जना स्ववियु पदाधिकारी मध्ये ८ पद प्रत्यक्षबाट र ७ पद समानुपातिकबाट निर्वाचित हुने छन् । 

तीन क्याम्पसमा निर्विरोध:  पाल्पाका पाँच क्याम्पस मध्ये तीन वटा क्याम्पसमा स्वतन्त्र विद्यार्थी युनियनको नेतृत्व निर्विरोध निर्वाचित भएको छ । जसमा माडव्य क्याम्पसमा अध्यक्ष सौगात कोइराला, दर्छा क्याम्पस रामपुरको अध्यक्षमा अनिशा कोइराला र उदबुद्ध कलेज पूर्वखोलाको अध्यक्षमा कृष्णा झ्यापुर्लुकको नेतृत्व निर्विरोध भएको हो । यी तीनै क्याम्पसको नेतृत्वमा एमाले निकट विद्यार्थी सङ्गठन अनेरास्ववियु आएको छ ।