गुल्मी, नेपाली काँग्रेसका प्रभावशाली नेता डा. चन्द्र भण्डारीले  युवालाई स्वदेशमै रोक्ने कर्यक्रम ल्याउन जरुरी रहेको बताएका छन् । शनिबार तम्घासमा नेपाली काँग्रेस रेसुङ्गा नगर कार्यसमितिको तेस्रो सम्मेलनलाई सम्बोधन गर्दै उनले यस्तो बताएका हुन् । 

नेता भण्डारीले अहिले देशका युवाहरु विदेश पलायन भइरहेको भन्दै स्वदेशमा युवालाई रोक्ने कार्यक्रमहरु सरकारले ल्याउन जरुरी रहेको उल्लेख गरे ।

उनले अब भाषणले मात्र देशमा परिवर्तन सम्भव नभएको बताए । नेता भण्डारीले नेताहरुका भाषणले नागरिकले धेरै दुःख पाएको भन्दै भाषणबाट कुनै पनि समस्या समाधान नहुने बताए । बितेका ३४ वर्ष जनताको कुरा संसदमा नउठेको भन्दै अहिले जनताका कुरा आफुले संसदमा उठाउँदै आएको उनले दाबी गरे । समयको परिवर्तनसंगै अहिलेको प्रविधि अनुसार राजनीतिक दल र नेताहरु अपडेट हुन जरुरी रहेको पनि उनले धारणा व्यक्त गरे । 

कार्यक्रममा कांग्रेसका केन्द्रीय सदस्य चन्द्र बहादुर केसी, लुम्बिनी प्रदेश उपसभापति भुवन प्रसाद श्रेष्ठ, जिल्ला सभापति खिलध्वज पन्थी, जिल्ला सचिव भगतसिंह खड्क, महासमिति सदस्य श्रीप्रसाद भलामी, क्षेत्रीय सभापतिद्वय पारिश्वर ढकाल, चन्द्र बहादुर महत, महिला संघ जिल्ला अध्यक्ष लक्ष्मी पाण्डे लगायतले आ–आफ्ना धारणा राखेका थिए ।