पाल्पा, जिल्लाको रैनादेवी छहरा गाउँपालिकाले आफ्नो सेवा चुस्त दुस्त बनाउदै सेवाग्राहीहरुलाई अनलाईनबाट सेवा सुविधा प्रदान गर्ने उद्देश्यका साथ  “रैनादेवी छहरा“ नामको आफ्नो मोबाइल एप्लिकेशनको सुरुवात गरेको छ । गाउँपालिकाले प्रदान गर्दै आएका हरेक किसिमका सेवा सुविधाहरुलाई अनलाईनमार्फत डिजिटल प्रविधीमा सेवाग्राहीले घर घरमै पाउने गरी मोबाइल एप्लिकेशनको सुरुवात गरेको हो  । 

सेवाको एक कार्यक्रमका बीच गाउँपालिका अध्यक्ष रुक्माङ्गत भट्टराईले शुभारम्भ गरे । एप्लिकेशन बाट तत्काल सेवाग्राहीले गाउँपालिका तथा वडाका सम्पूर्ण सूचना, जानकारी प्राप्त गर्न सक्ने छन ।  पालिकाले प्रदान गर्दै आएको सेवा प्रवाहको बारेमा  अध्यक्ष, उपाध्यक्ष, वडाध्यक्ष तथा प्रमुख प्रशासकीय अधिकृत, शाखा प्रमुखहरूलाई प्रत्यक्ष रूपमा सुझाव र गुनासो राख्न सक्ने व्यबस्था गरिएको पालिका अध्यक्ष भट्टराईले बताए ।  एप्लिकेशनमा आपतकालीन सेवा, प्रहरी, एम्बुलेन्स सम्बन्धी जानकारी तथा सम्पर्क नम्वरहरु राखिएको छ ।  सो एप्समा  गाउँपालिकाले निर्माण गरेका कानुनहरू तथा प्रकाशन गरिएका प्रतिवेदनहरू प्राप्त गर्न सकिने  व्यबस्था गरिएको उपाध्यक्ष युवराज थापाले बताए । 

सोमवार देखी सञ्चालनमा आएको पालिका एप्समा  गाउँपालिकाको नागरिक वडापत्र तथा सेवाहरूको विवरण प्राप्त गर्न सकिने छ ।  गाउँपालिका भित्रका विद्यालय तथा स्वास्थ्य चौकीहरू सम्बन्धी जानकारी प्राप्त गर्न सकिने छ । यस एप्सलाई आगामी दिनहरूमा गाउँपालिकाबाट प्रदान गरिने सेवाहरूलाई सूचना प्रविधि मैत्री बनाई अनलाइन माध्यमबाट सेवा प्रवाह हुने गरी विस्तार गरिनेछ । यो एप एक हप्तापछि गुगल प्ले स्टोरमा उपलब्ध हुनेछ ।  एप्लिकेशनमा आएका सुझाव गुनासाहरुलाई तत्काल कार्यान्वयनको व्यबस्था मिलाएको प्रमुख प्रशासकीय अधिकृत कृष्ण प्रसाद तिमिल्सीनाले बताए । पालिकाले एप्सलाई व्यस्थित रुपमा सञ्चालन गर्ने रैनादेवी छहराका जनताको हात, हातमा  पालिकाको सूचना गतिविधी पु र्‍याउने गरी डिजाईन गरिएको सूचना अधिकारी नारायण मल्लले बताए ।